E siman aki atrobe a sali un actualisacion tocante e recuperacion di e criatura Alexander Flores, ken actualmente ta na Colombia hayando tratamento despues cu el a ser haya inconsciente den e van di e crèche cu e tabata bishita, despues di keda den e van cera pa cinco ora. Bon Dia Aruba, como otro medionan di comunicacion, ta siguiendo Alexander su progreso y ta contento pa por reporta cu ta mirando un recuperacion fuerte.

E caso di Alexander Flores tabata uno cu a sacudi pueblo di Aruba. Fin di februari, comunidad a keda den shock pa e noticia cu un mucha homber di 5 aña a keda cera den un vehiculo di e crèche cu e ta bishita cu consecuencia cu el a stop di reacciona y su curason a para. No a warda pa translad’e pa Colombia urgentemente, unda awor e tin tres siman den hospital y ta mustrando señal fuerte di recuperacion.

E prome dianan di su recuperacion a encontra varios incertidumbre, unda na un punto a encontra un complicacion na momento cu algun di su organonan cu inicialmente no tabata mustra daño a cuminsa debilita, y su temperatura a subi varios biaha. Dokternan a sigui haci test y cambia tratamentonan pa trata di combati e complicacionnan.

Alex al fin a logra habri su wowo y a cuminsa move su curpa poco poco. Apenas un siman pasa, el a logra sali di ICU y actualmente ta hayando terapia fisico.

Den un video comparti riba red social, por mira Alex y su mayornan den tratamento, unda Alexander ta train su funcion cognitivo y motorico cu exito. Tur esaki ta duna un indicacion prometedor cu Alexander ta recuperando fuertemente, treciendo alivio na su mayornan y demas famia, como tambe comunidad di Aruba.

Den comentario riba red social, hende ta sigui duna Alexander nan sosten y oracion, gradiciendo Dios cu e criatura ta recuperando bon.

Alexander falta mas pa recupera completamente; e proximo fase di su tratamento lo consisti di siña papia atrobe. Sinembargo, e criatura ta sorprendiendo tur hende cu con rapido e ta recuperando, mustrando con fuerte e y su mayornan ta den e proceso dificil aki.

Imagennan ta saca for di video comparti pa mayornan di Alex riba red social.