BTW manera Gobierno ta propone lo destrui economia segun comerciante Smit

Gobierno no a baha gasto, al contrario. Gobierno ta parse di ta traha unicamente riba hisa su entradanan y esaki ta contra e pensamento tras di e reformanan. Como tal, empresario local Rudy Smit, manera cu el a expresa den reunion di Camara di Comercio, no ta sinti cu Gobierno ta cumpli cu e landspakket manera acorda cu Hulanda.

Minister di Finanzas Xiomara Maduro a mustra cu ta bay duna detaye di e BTW unicamente ora henter e proyecto ta cla. Mientrastanto tabatin indicacion cu esaki lo por ta entre 18 pa 21 porciento y siman pasa Gobierno a desmenti esaki, y mas bien por mira riba un porcentahe di 6 porciento di BTW riba cuminda y 14 porciento di BTW pa servicio y producto.

Pero asina mes, hasta cu un cifra supuestamente mas abao “locual Gobierno ta haciendo ta e mesun ‘dorpspolitiek’ di semper. Esta no kier entrega nada, pero pusha e problema financiero riba custia di pueblo. Aki ta unda economia ta bay cay, pasobra cu e locura aki por wel di lubida riba turistanan. Nan lo bay otro luga cu ta di e mesun of miho calidad, pero cu ta mas barata,” Smit a bisa Bon Dia Aruba.

Segun Smit, los di e BTW di 14 porciento, segun Gobierno, ta bay introduci cu tur director di un empresa mester bay paga belasting riba un salario minimo di 5000 pa luna, sin importa si e empresa por paga e salario of no. “E compania lo mester paga e impuesto. E intencion ta pa Gobierno bay purba saca otro 190 miyon mas for di e pueblo aki pa nan por sigui fiesta,” Smit a bisa.

BBO mester desaparece

Pa Smit e ta un hilaridad pa tende Minister di Finanzas yama comerciantenan sinberguenza ya cu prome cu cobra e BTW di 14 porciento mester elimina e BBO di 6. “Pero e no ta mira cu e gastonan adicional cu ta bin acerca pa e comerciante tene un bon administracion. E ta bay costa mas di e 6 porciento ey.” Smit a bisa cu hopi comerciante ta depende di e programa di admistracion Quick Books cu no por carga dos tarifa di BTW. “Mi programa por y mi ta haci e trabao. Pero e gasto pa un administracion asina, pues e prijs ta mas halto cu Quick Books tambe.”

Smit a bisa cu durante e reunion di Camara di Comercio el a vocifera su opinion cu Gobierno mas bien kier kibra economia den un para di luna. “Inflacion ta bira asina halto cu Aruba no ya no por sobrevivi. Si hisa e belasting di turista cu otro tres porciento, e turista lo no bin Aruba mas. Boneiro of Corsou of ambos lo goza di e turismo ey. Camara di Comercio tambe a bay de acuerdo, esta cu nan no ta mira con Aruba por bay carga tur e pesonan aki,” Rudy Smit a expresa.

Pensionadonan

Los cu Aruba ta bay bira mas caro, e poder di compra sigur pa e pensionado lo keda grandemente afecta. Pero Smit ta papia di e Arubiano comun, y no e dirigentenan di OPPA, cu nan mes a contribui na leynan actual sin corda cu un dia nan lo afecta nan. “Ta ken a bin cu e ley cu pensionado no ta paga belasting riba pensioen? No ta nan mes? E pensionadonan semper tabata e baca lechera di Gobierno pasobra no ta paga belasting riba AOV.

Pero cada cen cu nan haya di cualkier otro pensioen y of entrada ta paga belasting directo na 100% pasobra nan no tin e ‘belasting vrije voet’mas.  Awo cu nan a cambia e tarifa di belasting e ta bira mas cruel pasobra cada florin cu nan haya 14 cen ta bay directo pa belasting, sea cu e ta bin di pensioen of di trabao,” Smit a splica. “Ta ey e problema ta sinta cu a gaña e pensionadonan.” Smit a bisa cu mescos cu awor ta keha cu nan mester paga e prima completo di AZV. Hasta aki lo tin problema pasobra awor SIAD no kier acepta e suma ey como un gasto cu por kita di belasting mas. “Asina bo ta mira con hopi cos no a wordo haci corecto y a traha cos mita y mita sin busca drechi di e consecuencia cu esaki tin cune y esey mi ta mira ta bay pasa tambe cu e BTW. Waak awo tanto discusion invoerrechten di material di construccion bouwmaterialen. Con a para cu e accijnzen? Tur esakinan ta matando economia.”

Pero locual ta incomprendibel pa Rudy Smit ta cu tur cos ta indica cu Gobierno no kier baha gasto, al contrario. Ta keda hisa e gastonan y pueblo mester paga, sin cu tin suficiente placa pa biba. “Pa pueblo no tin espacio pa motibo di e situacion financiero. Pero pa cumpra auto di riba 150 mil si tin.”

No kier introduci BTW

Smit no ta su so den duda e seriedad di Gobierno. Es mas, partido RED cu tabata forma parti di Gabinete Wever Croes I bao cua a firma pa e landspakket, ta sigura comunidad cu locual kier haci cu reforma di belasting ta ilustra cu en realidad Gobierno no ni kier introduci e BTW.

“E BTW tabata parti di e exigencia di Hulanda. Pero mi a informa Hulanda, for di momento cu ma baha como Minister cu Prome Minister y MEP no tin e boluntad politico pa haci reformanan acorda. Nos di RED a bay de acuerdo cu reformanan, inclusivo BTW. Nos a bay de acuerdo cu reformanan di educacion ya cu nan a cuadra cu mi maneho. Independisacion di DPS y maneho financiero efectivo di enseñansa, tur mester a hisa eficiencia y baha gasto.”

Segun dr. Lampe, e intencion di e conferencia di prensa cu mester a cancela pa motibo di blackout, tabata netamente pa mustra cu documentonan, con MEP nunca tabata interesa den BTW, cu si ta bon implementa, ta mucho mas eficiente pa tur hende. “RED tabata e partido cu a bin cu e ley di iniciativa tipo di BTW na 2006 ora cu a introduci BBO cu ta acumulativo. Pakico? Pasobra BTW s ta mas transparente, ta crea mas entrada y ta duna un miho bista riba entrada di pais. Lo tabatin mester di menos ambtenaar pasobra tur e pagonan ta basa riba un cadena di informacion. Cu BBO mester tin control individual. Cu BTW, asina cu uno sconde, e siguiente ta haya sa.”

Simplificacion di sistema di belasting

E texto di e landspakket ta bisa cu mester simplifica e sistema di belasting. Pero cu e reforma ta bao encargo di Aruba. Lampe ta mustra con MEP ta haciendo e introduccion di BTW hopi complica, sin cu ta duna splicacion. “Aruba a firma pa e landspakket, pero te ainda Gobierno di Aruba no ta ehecuta nada cu a palabra. No a baha gasto di personal, otro cu corta den salario di ambtenaar. Kiermen, Gobierno no ta serio cu Hulanda.”

E Minister di Finanzas na 2006 tabata Nilo Swaen y segun Lampe, awor na 2022, Swaen ta de facto e Minister di Finanzas. “Na 2006, Swaen a argumenta cu BTW ta vulnerable pa fraude y demasiado complica pa comercio, contrary na opinion di Banco Central di Aruba, SER, gremionan comercial, asociacion di fiscalistanan di Aruba y Raad van Advies. “E tempo ey MEP no a kere den BTW, pues con por kere cu nan lo introducie awor?” Ora cu MEP a introduci BBO, Lampe a bisa cu el a pone un amienda pa e belasting sali separa riba e recibo, pa publico por wak kico a paga. Pero MEP no a accepta e amienda. “Mi a spierta e tempo ey cu ta bay tin abuso cu prijs. Awor aki Minister Xiomara Maduro ta pidi supermercadonan pa baha e prijsnan cu e porcentahe di BBO. Pero esaki no ta algo facil adminitrativamente ni comercialmente,” Lampe a mustra.

E ex Minister di Gabinete Wever Croes I a bisa cu e tin sospecho pakico MEP no kier BTW y lo splica esaki e siman venidero. “P’esey no tin un bon preparacion. Mi lo no keda sorprendi si nan no lo caba cu e proyecto. Nan no tin e boluntad.”