Refineria di Aruba: “Tin e posibilidad pa sigui haci negoshinan cu tankinan cu por duna un entrada y cu ta necesario pa preserva e refineria”

Ayera mainta Refineria di Aruba (RDA) a ofrece un conferencia di prensa di prensa pa informa tocante e terminacion di contract cu Citgo, di cual nan a confirma cu nan no kier desmantela e refineria.

Tocante esaki, Richard Eman presidente di Hunta di Supervision di RDA, a splica cu desde dia 10 di juni 2016 Gobierno di Aruba mediante e ex prome minister presidente Mike Eman y actual parlamentario Mike de Meza a firma varios acuerdo cu Nelson Martinez pa Citgo Aruba Holding y Citgo Aruba Refinery.

Cu esaki, Eman a expresa cu nan a haya tur e instalacion pa drecha esey y pone den operacion e mashinnan pa nan por traha cune, asina mes el a menciona cu den e tempo ey nan no a haci hopi cos cu e refineria y e tankinan, despues di dos aña y mey na comienso di 2019, finalmente Citgo a bin cerca RDA y nan a declara cu nan no por traha mas y no por cumpli tampoco cu apertura na 2020.

“Tin sancion cu a wordo imponi riba Citgo y door di esey nan no por sigui cu e trabou eynan”, Eman a sigura y desde e momento ey nan a stop di paga huur tambe y wordo pone den ‘default’ sabiendo cu nan no lo cumpli mas.

Eman a señala cu for di e momento cu nan a pone Citgo na default esey ta nifica cu ta un disputa, den e acuerdo ta menciona cu den henter procedura con ta bay trata cu e situacion di default aki di cual ta regarda cu den e momento ey mester bay pa un proceso di negociacion, mitigacion, cure process y despues si no lo Sali bon mester bay pa arbitrage.

Eman a relata cu esaki ta un proceso largo cu por tarda te 5 aña, pero segun e mes a sigura, “nos no por warda te 5 aña pa un contesta di un grupo di arbitrage”.

El a trece dilanti cu e proximo paso cu nan por haci pa Citgo ta pa desmantela e instalacionnan, “esey ta e maximo cu nos por haci”, asina mes el a afirma cu Gobierno di Aruba y RDA no kier desmantela, nan kier habri e refineria, habri e tankinan, duna pa Arubianonan trabou, nan kier pa gobierno haya entrada pa nan por cumpli cu obligacionnan di salud, infrastructura, entre otro, pa finalmente haya un economia basa den mas cu turismo so.

Eman a relata cu desde e momento cu Mike Eman, Mike de Meza y Nelson Martinez a firma e contract aki cu normalmente den tur acuerdo e expectativa cu tur dos banda lo gana, e parti di Citgo ta un bon situacion, pero e parti di Aruba of RDA tabata malo loke ta nifica cu Citgo por haci loke nan kier.

For di momento cu Citgo hunto cu RDA a haci e prome reunion, Eman a aclaria cu nan no por laga e refineria sin haci nada di e cual Citgo a bisa cu nan lo kier suspende e contract, pero den bista cu tur cos lo keda atras, nan a suspende e contract temporalmente y nan a duna bek tur instalacion pa RDA pa nan por desaroya loke nan tin planea.

Di esaki, a bin dilanti un Memorandum of Understanding (MoU) cu tur e puntonan documenta y acorda y a base di esey ta bin un acuerdo cu ta yama Temporary Suspension and Transfer Agreement cu for di e momento ey nan a dicidi di kita tur e trahado, pa cu esaki, Eman a comenta cu “esaki ta un relacion di dunado di trabou y trahado, nos no por mete eynan, pero nan mester trata nan trahadonan bon”.

Eman, a trece dilanti cu pa cada biaha cu nan tabata reuni cu Citgo nan tabata trece condicionnan nobo y na final di aña 2019 nan a dicidi di haci un terminacion di contract, “Citgo a declara cu na januari nan ta manda tur trahado pa cas, nan ta pone e yabi na e post y nan ta bay, pero esey nan no por haci”.

Di loke ta trata e momentonan aki, Eman a bisa cu loke nan kier ta pa pone e tankinan den servicio, busca un operador pa drecha e refineria y opera e refineria, den pasado Eman a bisa cu gobierno anterior no tabatin esaki den mente.

Renny Arends director interino di RDA a splica cu un parti beneficioso cu a resulta den e acuerdo ey ta cu un bes cu nan a haya e facilidad ora e situacion politico di Venezuela lo cambia cu e sancion a wordo kita, Citgo por bin bek pa sigui cu e rehabilitacion, e parti di distribucion cu semper tabata wordo maneha pa FMSA lo keda den man di FMSA.

Otro posibilidad tambe ta pa sigui haci negoshinan cu e tankinan cu por duna un entrada y cu lo ta necesario pa preserva e refineria durante cu Citgo no t’ey y si nada no wordo haci e refineria mes lo desmantela su mes door cu ta ubica den un luga cu tin un nivel di corosion hopi halto.

Di su parti, Eddie Oduber manager general di Terminal Di Energia di Aruba (TDEA) a trece dilanti informacion di e terminal na e momentonan aki di cual el a mustra den varios potret e condicion di e terminal, di esaki el a bisa cu ta trece hopi preocupacion pa e parti di e terminal y refineria debi na mal estado cu nan ta.