Reforma ta costa placa, pero asina mes mester corta 11 miyon den presupuesto di enseñansa

Minister Endy Croes ta sigura cu ta bay traha creativo y cu enfoke pa aumenta calidad

Ministerio di Enseñansa lo mester corta 11 miyon florin pero e Minister encarga, Endy Croes ainda ta purba negocia pa minimalisa e cortamento. Pero asina mes cu ta negociando cu coleganan y cu Hulanda riba e suma, esey no ta kita su enfoke pa mehora calidad di enseñansa. Asina Endy Croes a bisa ayera durante su conferencia di prensa.

“Compas y Guia di enseñansa lo keda e SDG 4 y e PEN 2030 (Plan Nacional di Enseñansa) unda den comunicacion cu esnan cu ta traha den e area lo yega na decisionnan balansa, pa miho porvenir di educacion. E enfoke lo ta hisa calidad, sigui cu e asina yama lifelong learning, y tambe brinda oportunidad na hoben pa haya acceso na calidad di enseñansa,” Croes a bisa ayera mainta.

Data ta valioso

P’esey mes ta importante cu tin informacion, data relevante pa por midi y guia educacion na Aruba, e Minister a bisa. A combersa cu Direccion di Enseñansa cu ta usa e sistema EMIS di Unesco, (Educational Management Information Systems), pa compila data pa maneha e departamento na e miho forma. Pero a ripara cu tin deficiencia y durante e reunionnan a identifica kico falta, y e Minister ta kere cu denter di algun luna por soluciona e falta di informacion cu tin den e EMIS. Por ehempel, SKOA ta usa un sistema pa conecta tur su 46 scolnan y SKOA tin informacion di cada alumno. Pero e datonan di SKOA no ta bay automaticamente pa e EMIS.

“E conexion aki no t’ey. Den un reunion recien Direccion di Enseñansa a pidi na nivel di Director combersa riba kico mester na informacion di entre otro SKOA y traha riba e protocolnan necesario. Bureau di Minister lo percura pa busca un compania pa traha e ‘interface’ esta e programa cu ta conecta e dos sistemanan na otro pa denter di poco cu regularmente data di diferente organisacion di scol na Aruba por yega Direccion di Enseñansa.”

Pa loke ta DPS, cu ta Direccion Scolnan Publico, no tin un sistema mes di colecta informacion di alumnonan. E Minister kier pa DPS haya su propio sistema di colecta data y pa medio di e ‘interface,’ ta comparti e informacion cu Direccion di Enseñansa. “E ora ey nos por tin data disponibel pa guia enseñansa den su totalidad na un forma mas eficiente,” Minister Endy Croes a enfatisa.

El a splica cu DPS lo mester di mas atencion y kier mira mas profesionalisacion, unda ta traha segun un sistema mas structura segun un modelo di empresa, unda eficiencia y maneho efectivo di e scolnan ta na prome luga. Lo pasa dor di e proceso y asina cu ta cla lo duna mas informacion. Ya caba a cuminza combersa cu cabezantenan pa sa cua ta e puntonan di dolor, pa soluciona locual ta considera problematico. Un di nan ta e maneho di no laga mucha keda sinta, unda a pasa e decision den man di mayornan. “Nos a haya hopi comentario di cabezantenan di scol, riba pakico si of pakico no y nos lo tuma decision den futuro cercano riba e maneho aki.” E Minister a bisa cu si resulta cu e maneho di no laga mucha keda sinta ta resulta di no a funciona, lo draai e bek, basa riba argumento pa mayornan tambe compronde. “E ta un di e puntonan cu a bin hopi riba agenda durante e combersacionnan.”

Necesidad di inversion pero urgencia pa corta

En todo caso, tin e fondonan pa e interface, pasobra ta proyectonan mas chikito, e Minister a bisa. Pero realidad ta berdad cu tin un presion pa presupuesto balansa na 2022, cu a nifica cu mester a corta 11 miyon florin for di enseñansa. “Mi plegaria ta cu si mester corta den enseñansa awor, mester gasta e placa despues den otro programa social. Ta combersacion cu nos ta hibando interno. Y cada biaha cu mi sinta cu hendenan di Hulanda (a base semanal) mi ta duna e mesun mensahe.” Realidad sinembargo ta cu te ainda mester sigui cu e plannan pa corta inversion den enseñansa.

OAA

Otro punto di preocupacion di ta e necesidad di docentenan reemplazante (invallers) cu ta keda un punto problematico. Mas cu claro, hunto cu conseheronan nos ta analisando e problematica y departamentonan lo duna nan punto, pa bin cu un maneho mas concreto cu ta sirbi bienestar general.” E Minister a bisa cu ta bay sigui cu e combersacionnan cu cabezantenan y directivanan di scol, pa asina trece trankilidad y paz mental riba tereno di enseñansa.

Pa loke ta Onderwijs Avondleergangen Aruba, esta Enseñansa Publico Profesional pa adulto, ainda no a conclui e analisis cu ta ehecutando, unda a papia cu tur stakeholders riba e instituto. Unabes e rapport ta cla, lo publica esaki. E educacion pa adulto lo cuminza pronto, y e Minister a sigura cu e decision lo ta na interes general, y sigur pa esnan cu ta pendiente pa e cursonan y esnan cu mester duna e lesnan.

Rapport Inspeccion

Mientrastanto Inspeccion di Enseñansa di Aruba y di Hulanda hunto a haci revision di henter e sector na Aruba y tin un rapport intermedio. Bon Dia Aruba a puntra e Minister si ta posibel pa publica e rapport, y riba esaki, Minister Croes a bisa cu mirando cu e rapport no tin conclusion final, e no por haci esey. E rapport final lo ta cla na Maart 2022.

Pero locual si e por a informa ta riba algun di e recomendacionnan den e rapport intermedio, unda ta papia di e conexion entre e diferente sistemanan educativo, no solamente cu Hulanda y estudio superior, pero tambe entre e sistemanan educativo na Aruba mes y cu Mercado laboral. Ta papia di e leynan anticua riba e tereno di enseñansa, for di nivel primario te educacion profesional (cu no tin ley mes). Aruba tampoco tin e Ley di Supervision, cu mester pa Inspeccion (na Hulanda e ta conoci como WOT). Den otro palabra, ta hopi ley a keda atras na Aruba.

“Na final di dia, ora cu haya recomendacion, mester tin placa pa implementa nan. P’esey mi ta cauteloso, y ta prefera pa e rapport sali.” Pasobra segun e Minister, trece recomendacion y exigi cortamento no ta cuadra cu otro. “Tin otro proyecto cu nos mes por ehecuta. Nos mes ta bay ta creativo.”

Personal Bureau

Riba e pregunta di Bon Dia Aruba riba cuanto persona e Minister tin ta traha na su Bureau pa haci e trabaonan aki, su contesta tabata cu e total ta 10. Pero e no ta descarta cu e mester busca of cumpra servicio di hurista mirando e reformanan den enseñansa cu mester tuma luga. En todo caso, mayoria di su staff na su bureau experto y hurista y otronan ta pa sostene e trabao. For di tempo di Gabinete Wever Croes I a palabra, hunto cu Gobernador cu no ta excede 25 persona na bureau di Minister cu ta hopi menos cu e 147 cu ex Prome Minister Mike Eman a yega na dje. Ademas, Endy Croes a sigura cu mayoria di e personanan den su despacho a bin di sector publico mes.

Leerorkest Aruba

Finalmente, Minister Croes a mustra cu e tabata contento di a ricibi bishita di Directiva di LeerOrkest Aruba hunto cu Director Johnny Croes cu a compaña Director di LeerOrkest Amsterdam Sr. Marco de Souza pa por a haya mas informacion di e programa educativo di musica. E Minister a bisa di a keda impresiona cu ya caba tin mas di 2000 mucha ta hayando les di musica y otro 300 y pico, les di instrumento. Croes a bisa cu hunto lo coopera pa asina no solamente e lesnan aki lo continua na scolnan, pero cu LeerOrkest Aruba lo yuda den proyecto piloto pa programanan di musica despues di scol den tres districto. “Di parti di mi Ministerio y tambe di parti di Minister pa Asuntonan Social Sr. Rocco Tjon crea un programa similar pero pa despues di scol.”