(Infobae) – Regimen Venezolano a detene e reconocido asesor petrolero, ciudadano Mericano di 86 aña, Evanan Romero, segun medio Spaño, ABC. E captura a sucede na Maracaibo, ora Romero tabata prepara pa subi un vuelo pa Caracas pa cumpli cu un agenda di reunion cu companianan petrolero internacional.
Segun e consultor, el a keda aresta sin cargo claro y actualmente ta bao vigilancia den un clinica priva, despues cu e autoridadnan a permiti su transferencia pa motibo medico despues di su prome anochi den un oficina di Interpol.
E detencion ta sucede den un contexto di presion diplomatico for di Cas Blanco, cu a promove inversionnan energetico den e pais Caribeño despues di captura di Nicolas Maduro riba 3 di januari. Romero, cu tambe tin nacionalidad Venezolano, a drenta e pais algun dia prome for di Panama, cu escala na Colombia, y a usa su cedula Venezolano pa vuelo interno. Segun su testimonio, e orden di aresto “a aparece den e computer” na momento di check-in na aeropuerto, y oficialnan a separ’e prome cu e por subi e avion.
Romero a indica cu e no a haya notificacion di cargo formal ni procedemento hudicial contra dje. E ta atribui e detencion na un disputa administrativo bieu — cu ya a keda resolvi na Corte Supremo di Husticia na su fabor — y ta sugeri cu tin motivacion politico, presuntamente conecta cu fiscal general Tarek William Saab. E consultor a señala cu nunca e no tabatin restriccion pa biaha na Merca ni Europa, y cu e alerta di Interpol ta reciente.
Cu un trayectorio cu ta inclui fundacion di INTEVEP, e vice-presidencia ehecutivo di PDVSA y e cargo di Vice-Minister di Energia y Mina durante e apertura petrolero, Romero ta considera un figura clave den e contact recien cu companianan internacional manera Repsol y Reliance. De hecho, su agenda na Caracas tabata inclui reunion cu directornan di e companianan aki pa explora e regreso di inversion y stabilisacion energetico, den marco di un strategia coordina cu Washington.
Romero ta parti di un comision forma pa mas o menos 400 ex-tecnico y ex-director di PDVSA, dedica na desaroya propuestanan pa reconstruccion di e sector energetico bao di un futuro gobierno. El a mantene dialogo cu companianan petrolero Mericano manera Exxon y ConocoPhillips, y su nomber a figura den discusionnan riba compensacion di activo expropria y apertura di blokinan nobo.
E detencion di Romero a coincidi cu e bishita na Caracas di Secretario di Energia di Merca, Chris Wright siman pasa, y cu exigencianan renoba di administracion di Donald Trump pa garantisa condicionnan faborabel pa inversion stranhero. Washington a reitera cu e reconstruccion di e sector petrolero Venezolano lo depende di garantia legal y politico cla. E aresto di un figura tecnico di perfil halto no solamente ta afecta un consultor cu problema medico, pero tambe ta interumpi comunicacion entre sectornan di oposicion, inversionista potencial y e administracion Mericano cu ta interesa den reactiva e fluho di crudo Venezolano door di refinerianan den e Golfo.
E prome audiencia di corte, plania pa diaranson, lo ser mira como un indicador di e margen real pa un transicion ordena y pa e regreso di capital internacional na e principal activo economico di Venezuela.



