Riba dia 16 di october 2026, Gobierno a anuncia un maneho nobo pa short-term vacation rentals. Minister Geoffrey Wever a splica cu doñonan di propiedadnan cu ta operando prome cu 1 di november mester registra. Nan lo mester duna nan nomber, datonan di contacto, e localidad y e periodo cu e propiedad ta operacional. Bo tin tres luna pa registra, via un plataforma digital.

Nada a wordo bisa tocante impuesto. Y e punto ey ta importante. E registracion aki ta un bon oportunidad, pasobra cu e datonan aki Gobierno facilmente por controla si impuestonan a wordo paga.

Registracion no ta reemplasa vestigingsvergunning

Un punto importante ta cu doñonan di propiedad cu ta ofrece nan cas of apartamento pa huur via plataforma manera Airbnb, tambe mester cumpli cu e exigencianan legal pa opera un actividad comercial na Aruba. Esaki ta inclui e obligacion di tin un vestigingsvergunning, den casonan cu e ley ta exigi esaki.

Sin embargo, tin indicacion cu hopi di e propiedadnan aki ta wordo ofreci pa huur sin cu nan doño tin e permiso necesario. E registracion nobo ta ofrece Gobierno un oportunidad pa controla no solamente si e doñonan ta paga impuesto, sino tambe si nan ta cumpli cu e reglanan pa opera legalmente.

Registracion riba un plataforma digital no ta nifica automaticamente cu un propiedad tin tur permiso necesario. Gobierno mester percura pa cu e sistema nobo no termina legitimando actividadnan comercial cu ainda no ta cumpli cu ley.

Kico ta riba mesa

Aruba Tourism Authority (ATA) ta sigui tur short-term vacation rental via su plataforma Lighthouse. Segun e cifranan di ATA:

Entrada na 2025: US$315,5 miyon, casi cuater biaha e nivel di 2019.

Parti di bishitante cu ta keda pa anochi (stayover): 35%, mas cu hotel.

No tin datonan publico di cuanto a wordo paga, pero segun e calculacion di ATA, pais Aruba ta perde entre Afl. 60 y 70 miyon pa aña.

Registracion como base pa control di impuesto

E formulario di registracion ta pidi exactamente loke Departamento di Impuesto (DIMP) tin mester: ken ta e doño, unda e propiedad ta, y desde ki tempo e ta wordo uza como short-term vacation rental. Hunto cu e datonan di Lighthouse di ATA, cu ta mustra e entrada pa cada propiedad, DIMP tin un base cla pa compara cada propiedad registra cu su declaracion di impuesto.

E ley ya ta permiti esaki:

Cobra despues: DIMP por pone un naheffingsaanslag pa impuesto cu no a wordo paga (Algemene landsverordening belastingen, articulo 15).

Sin declaracion: e Inspector por fiha e montante mes.

Cinco aña: e periodo normal cu DIMP por bay atras.

Dies aña cu intencion (opzet): un doño cu conscientemente nunca a registra ni declara por wordo cobra te cu dies aña atras.

Cuanto por wordo cobra

Basa riba e cifranan di entrada di ATA (impuesto turistico so):

Periodo Total di impuesto turistico Parti no paga (calculacion)

2021–2025 (cinco aña) Afl. 240 miyon Afl. 48–132 miyon

2019–2025 (cu intencion) Afl. 266 miyon Afl. 53–146 miyon

Si e calculacion di ATA ta corecto, e montante no paga ta entre Afl. 216 y 239 miyon. Ariba di esey tin boet y interes.

Doñonan stranhero tambe mester paga

Hopi short-term vacation rental na Aruba ta propiedad di doñonan stranhero. Hopi di nan ta haya nan pago via Airbnb, Vrbo of Booking.com directamente riba un cuenta pafo di Aruba. Pero e entrada ta wordo genera na Aruba, y p’esey e doño mester paga impuesto na Aruba ariba entrada genera door di su propiedad na Aruba, sin importa unda e ta biba.

Esaki ta nifica:

Registracion na DIMP: cada doño stranhero cu ta uza su propiedad como short-term vacation rental mester ta registra na Departamento di Impuesto y mester declara su entrada.

Propiedad unda un individuo ta doño: impuesto riba entrada (inkomstenbelasting).

Propiedad unda un compania ta doño: winstbelasting di 22%.

Impuesto turistico: e doño ta responsabel pa cobra y paga e impuesto turistico. Un doño stranhero por nombra un representante fiscal na Aruba pa declara y paga.

Tur hende mester contribui

Hotelnan y empresanan local ta paga nan impuesto tur luna: impuesto turistico, winstbelasting, loonbelasting pa nan trahadornan. Nan ta haci esey den e mesun mercado unda short-term vacation rentals ta competi pa e mesun turista. No ta husto cu un parti di e sector, incluso hopi doño stranhero, ta gana placa na Aruba sin contribui.

E registracion no mester conta propiedad so. E mester ta e momento cu tur doño, local of stranhero, ta cuminsa paga su parti di impuesto. Y unda no a paga den añanan pasa, DIMP tin e herment pa cobra esey ainda: te cu cinco aña atras, y te cu dies aña si tabata intencional.

Short-term vacation rentals ta forma parti di e producto turistico di Aruba y ta duna hopi famia un entrada extra. Pero hotelnan ta paga, empresanan local ta paga y nos ciudadanonan ta paga. Esnan cu ta uza nan propiedad pa short-term vacation rental tambe mester paga.

Un inhusticia contra esnan cu ta paga

Cada florin cu un short-term vacation rental no ta paga, ta un inhusticia contra e empresanan cu si ta cumpli. Un hotel of un empresa local ta declara tur luna, ta wordo controla y ta paga boet si e entrega laat. Un doño cu no ta paga impuesto turistico ni impuesto riba su entrada, por ofrece un prijs mas abao pa e mesun turista. Esaki no ta competencia husto.

Ademas, cada florin di impuesto cu no ta wordo paga ta un florin menos pa Aruba. Mientras Gobierno ta studia impuestonan nobo pa turista y pa e sector, e prome paso mester ta cobra e impuestonan cu ya ta existi. No ta husto pa esnan cu ta paga keda carga e peso di esnan cu no ta paga.

E registracion ta duna Gobierno e herment. Awo e mester uz’e.