25aug (NP) entrevista.jpg

Minister encarga cu Turismo Otmar Oduber ta satisfecho cu a pasa e ley di All Inclusive. E ta informa Bon Dia Aruba cu e no ta contra All Inclusive, sino ta mira e importancia pa regula e cantidad. Actualmente 34% di camber ta All Inclusive, ley ta permiti bay te 40%.

Ta casi 3 aña cu a cuminsa cu e estudionan y no tabata facil pa tuma un decision ki direccion pa bay pasobra no tabatin mucho caminda cu por a wordo cana. Mas o menos 1 aña y algo pasa despues cu e situacion na Radisson a bira un problema cu e hotel a casi bira All Inclusive, mester a tuma un decision mas acelera. E tempo ey e unico caminda cu tabata viabel pa regla e situacion, tabata via e ley di All inclusive aki. Cu a wordo regla den Parlamento diamars cu 12 voto na fabor, Sr. Oduber a bisa.

 

“Naturalmente e ta termina un periodo di basta discusion den comunidad entre gobierno y tambe Ahata. Otro gremionan tambe a pidi diferente biaha pa bay mesa pa tempo pasa y mas estudio wordo haci. Mi ta kere cu gobierno a cumpli cu tur peticion di diferente gremionan den e sentido cu na mei a pidi un ‘cooling off period’ y aworaki despues di 4 pa 5 luna no a bin ningun alternativa di parti di Ahata. Ahata no tabata interesa mas pa sinta na mesa cu gobierno y di otro banda por a mira cu rapportnan adicional a wordo traha pa e impacto economico di Banco Central, pero tambe a traha un di dos opinion riba e aspecto legal cu ta sostene ambos rapport, sostene e ley cu gobierno a presenta, como tambe e estudio haci pa Price Waterhouse Coopers (PWC).”

 

40% total All Inclusive

El a sigui splica cu den Parlamento a sigui trece diferente biaha dilanti pa loke ta e cantidad di cambernan 34% di cambernan ta wordo opera como All inclusive. E ley ta permiti pa bo bay te 40% y ora haci un calculacion di esaki, e ta cay riba 540 camber. “Ningun momento tin 1500 camber mas pa bin, manera ta wordo treci door di MEP”. Esaki manera ta conoci tin un maneho cu ta bay hancra na e Decreto Ministerial. E ta encera cu pabou no por tin otro tipo di hotelnan cu ta wordo fomenta cu ta Boutique Hotel y Niche Markets. Door di esaki e posibilidad pa un hende opera un All Inclusive practicamente ta wordo limita na San Nicolas. Dicon na San Nicolas? Como cu eynan no ta desaroya y no tin un producto pa desaroya hotel, pues ta laga e porta habri pa cuminsa cu un All Inclusive habriendo porta pa un desaroyado interesa pa cuminsa cu un All inclusive mientras cu ta crea e desaroyo den e area di San Nicolas y pariba di brug, cual naturalmente mester continua cu desaroyo turistico cu lo tin beneficio pa henter e comunidad di San Nicolas. “E ta un oportunidad cu ta laga habri pa San Nicolas”, e mandatario a enfatisa splica.

MEP ta hopi bruha den e materia aki, hopi tempo pasa ora cu Westin a bira All Inclusive y Radisson a hera bira, nan a para fuerte contra di All Inclusive. Sr. Oduber ta enfatisa cu nan ta para pa un regulacion di All Inclusive. Un regulacion no kiermen cu ta stop, of cu ta contra di un All Inclusive. Ta percura cu tin un balansa den e mercado y ofrecemento cu tin den inventario. Segun e mandatario ora cu ta papia di balansa e ta referi na cambernan regular (EP), All Inclusive y Time Share cu tambe ta conoci na Aruba. E mix aki cu tabata exitoso pa mas cu 30 pa 35 aña aki na Aruba kier mantene a base di e regulacion aki.

 

LEAVE A REPLY

Please enter your comment!
Please enter your name here