En vista di e actual turbulencia encuanto operacion militar di Estadonan Uni pa combati specificamente transporte di droga for di costa Venezolano, e posible envolvimento den esaki di e teritorionan Hulandes tambe ta hala atencion. Sin embargo, no semper ta conoci te unda y pa cual teritorio e responsabilidadnan di Reino Hulandes ta yega.

E pais tin hurisdiccion den dos tipo di zona, e awanan teritorial cu tin un maximo di 12 miya nautico (22,2 km) y ta e zona mas cerca di costa. E Zona Economico Exclusivo ta un zona di maximo 200 miya nautico, dependiendo di e posicion di e pais. Den e caso di Aruba no tin un zona exclusivo na e banda pazuid unda ta comparti lama cu Venezuela, pero si panort di nos isla. Na banda West e zona ta limita pa e zona di Colombia y na parti Oost e frontera maritimo cu Corsou.

E motibo pa publica e mapa aki, ta pa por ilustra e area pa cual Reino Hulandes ta responsable, incluyendo e zonanan economico exclusivo di Reino directamente y e zonanan cu ta resorta bao di un teritorio insular, manera ta e caso di Corsou y Sint Maarten. Ta trata aki di e asina yama frontera exterior di e zona di Reino, mientras internamente ta distingui e areanan cu por cay en principio bao di un teritorio insular. Por nota cu e zona economico exclusivo di islanan ABC no ta grandi, compara cu e totalidad di lama Caribe, pero ta exactamente e area unda tin mayor movimento di trafico ilicito for di costa Venezolano.

Tumando na cuenta e recien aumento di accion di Estadonan Uni den region di Caribe pa por combati narcotrafico via lama den nos region, ta importante señala cu un di e areanan mas sensitivo ta netamente banda di Aruba. Esaki pasobra den ultimo añanan gobierno di Venezuela a opta pa ehecuta un militarizacion fuerte riba peninsula di Paraguana, argumentando cu esey tabata necesario pa combati narcotrafico cu tabata abundante. Sin embargo, varios relato internacional, entre otro di e organisacion InsightCrime, tabata mustra riba actividad di hasta cartelnan Mexicano na Paraguana, aparentemente por lo menos tolera pa gobierno di presidente Maduro.

E tamaño reduci di awa teritorial y zona economico exclusivo ta haci cu ta imposible pa Reino Hulandes haci un bon trabao di vigilancia sin colaboracion estrecho cu e otro paisnan proximo na nos. E colaboracion cu Colombia, Republica Dominicana, Merca y otro teritorio den Caribe no ta e problema, pero e colaboracion cu autoridadnan Venezolano lo ta un pregunta grandi. Merca a anuncia di bay directamente contra e asina yama ‘Cartel de los Soles’. E nomber aki ta bin di e solo cu e generalnan Venezolano ta carga riba nan uniforme. E cartel ta acusa di relacion estrecho cu alto mando militar Venezolano y cu presidente Nicolas Maduro.

Nota: Mester tene cuenta cu e mapa aki no ta duna e status di Aruba y Bonaire completamente corecto. Bonaire su zona desde 2010 ta pertenece na Reino Hulandes, y den e caso di Aruba nunca a regla e traspaso legal di e zona pa Aruba, loke ta requeri pasa un ley na Aruba pa efectua esaki. Por lo tanto e zona aki tambe ta cay bao di Reino.

E zonanan marca aki como “EU Exclusive Economic Zone” ta e partinan cu ta directamente liga na un pais Europeo. Por ehemplo, den e caso di e teritorionan Frances nan no ta “Teritorio di Ultramar” liga na un pais di Union Europeo, sino parti integral di e pais Europeo; mescos e caso di Bonaire, Saba y Sint Eustatius.