Ministernan di Husticia di Aruba, Corsou, Sint Maarten y Hulanda a reuni dia 16 di januari 2026 na Sint Maarten pa e semi-anual Justitieel Vierpartijenoverleg (JVO), enfocando riba fortificacion di cooperacion den henter Reino Hulandes den areanan di aplicacion di ley y sistemanan di capacitacion

pa e lucha contra crimen organisa y intercambio di informacion hudicial.

Den un carta fecha 9 di februari, minister di Husticia y Seguridad Hulandes, Foort van Oosten a informa Tweede Kamer tocante e encuentro. E reunion, presidi pa Minister di Husticia di Sint Maarten, Nathalie Tackling, a trece e cuater pais hunto pa papia tocante retonan comparti dentro di e cadena di husticia y pa evalua e progreso riba iniciativanan continuo. JVO ta ser considera como e foro central pa coordinacion riba asuntonan di husticia dentro di Reino y tin como meta pa garantisa un acercamento coherente y efectivo pa asuntonan transfronteriso y regional.

Un tema central di e reunion di januari tabata e desekilibrio persistente den capacidad den diferente parti di e cadena di husticia den e parti Caribense di Reino. Mientras cu a haci inversionnan den servicionan conhunto manera Recherche Samenwerkingsteam (RST) y Koninklijke Marechaussee, ministernan a reconoce cu e retonan ta keda na nivel local, incluyendo dentro di cuerponan policial, servicionan di Ministerio Publico y facilidadnan di detencion.

E desbalansa aki por resulta den situacionnan caminda aumento di capacidad di investigacion no ta conduci na siguimento corespondiente den persecucion of detencion, afectando e efectividad di aplicacion di ley den henter Reino. E ministernan a reitera cu husticia ta primordialmente un responsabilidad nacional, pero a enfatisa cu deficiencianan den un pais por tin implicacionnan mas amplio pa seguridad regional y di henter Reino.

Pa atende esaki, e ministernan a bay di acuerdo pa crea un bista mas cla y comparti di e retonan di capacidad den cada un di e cuater paisnan. Lo haci un inventario amplio di capacidad dentro di servicionan di husticia, cu Hulanda ta tuma responsabilidad pa mapa capacidad den servicionan conhunto. E trabaonan lo keda coordina pa medio di e grupo di trabao existente di JVO riba desbalansa, den cual tur pais ta representa. E inventario ta destina pa identifica scarsedad structural y informa decisionnan di politica den futuro.

E reunion tambe a subraya e importancia di comunicacion y coordinacion consistente entre ministerionan Hulandes cu ta envolvi den asuntonan di Reino. Ministerio di Husticia y Seguridad a enfatisa su cooperacion estrecho cu ministerio di Interior y Relacionnan den Reino (BZK), cu ta keda activamente envolvi den gruponan di trabao relaciona cu JVO y desaroyonan den e paisnan Caribense. E cooperacion interministerial aki lo continua como preparacion pa e proximo JVO.

Sistemanan di detencion a forma un otro topico grandi di discusion. Mientras cu detencion ta keda un responsabilidad nacional, ministernan a enfatisa e importancia di cooperacion y compartimento di conocemento pa garantisa facilidadnan di detencion sigur, humano y cu prueba di futuro den henter Reino.

Por a tuma nota di adelanto den varios area, mas prominente na Sint Maarten, unda a cuminsa cu construccion di e prison nobo di Point Blanche. Hulanda ta contribui €20 miyon na construccion di e instalacion nobo, hunto cu €10 miyon adicional pa sostene mehoracionnan mas amplio den e sistema di detencion riba e isla. E ministernan conhuntamente a marca e inicio di construccion na e margennan di e JVO.

E ministernan tambe a bay di acuerdo pa sigui cu e trabao di e taskforce di detencion existente, cu ta inclui representantenan di tur cuater pais. E taskforce ta sirbi como un plataforma pa intercambia experticio y miho practicanan. Banda di esaki Hulanda a expresa su apoyo pa un contesta conhunto riba e evaluacion di e Onderlinge Regeling Detentie realisa door di Conseho pa Aplicacion di Ley. Un grupo di redaccion dedica lo ser establece pa prepara e contesta aki.

Fuera di detencion, ministernan a papia tocante e necesidad pa fortalece cuido forensico, incluyendo tratamento bao di e medida di terbeschikkingstelling (TBS) y ponemento di hobennan den institutonan hubenil (PIJ). Tratamento adecua di individuonan cu problemanan psicologico of psikiatrico a ser describi como esencial pa reintegracion efectivo y seguridad publico.

Actualmente, opcionnan di cuido forensico specialisa ta keda limita den e parti Caribense di Reino. Reconociendo e buraco aki, e ministernan a recorda nan acuerdo anterior, alcansa na juni 2024, pa desaroya un programa di varios aña enfoca riba cuido forensico, TBS y ponemento di hobennan den institutonan.

Den e reunion di januari, e grupo di trabao di henter JVO cu ta responsabel pa e programa aki a informa di e progreso cu a haci te cu awor. Tur cuater pais a compromete nan mes cu e iniciativa riba un base di largo plaso, cu e siguiente fase enfoca riba establece teamnan di proyecto local adapta na necesidadnan regional. Reclutamento ta andando pa un gerente di programma, cual posicion lo ser financia door di Hulanda. E gerente aki lo coordina proyectonan di mehoracion general y sostene e lansamento di iniciativanan local.

E ministernan a dedica atencion significante na e lucha contra “georganiseerde ondermijnende criminaliteit” – esta criminalidad organisa cu ta mina sociedad, describiendo esaki como un prioridad comparti cu ta rekeri un acercamento coordina den henter Reino. Mientras cu Aruba, Corsou y Sint Maarten ta ser mira como partnernan comprometi, ministernan a reconoce cu retonan ta keda significativo den region di Caribe.

Un di e instrumentonan clave cu a ser discuti tabata e Ondermijningsplatform Cariben, un plataforma multidisciplinario dirigi riba mehoracion di cooperacion y fortificacion di e respuesta na crimen organisa. Hulanda lo provee ​​financiamento structural di €500.000 a traves di e Directoraat Generaal Ondermijning (DGO) pa sostene e obhetivonan strategico di e plataforma. E financiamento aki ta destina pa engrandece partnershipnan a largo plaso, coordinacion di red y compartimento di informacion den henter Reino.

E ministernan a enfatisa cu atende cu criminalidad no ta limita na aplicacion di ley penal so. Medidanan administrativo ta hunga un rol cada bes mas importante. Na fin di 2025, e grupo di trabao di JVO riba enfokenan administrativo a completa un evaluacion di e protocol cu ta regla e contesta administrativo na crimen organisa den e paisnan Caribense. A base di e evaluacion aki a traha un protocol revisa y aproba pa tur minister, fortificando e cuadro administrativo di henter Reino.

Wardacosta di Caribe (Kustwacht Caribisch Gebied) a sobresali manera un aspecto vital den e cadena di husticia y seguridad. Responsabel pa deteccion trempan di traficacion di droga, contrabanda di arma, migracion ilegal, pesca ilegal y ofensanan ambiental, Wardacosta ta hunga un rol central den seguridad regional.

Prome cu e JVO, minister Hulandes di Husticia y Seguridad y minister Tackling a bishita Wardacosta, cu ta marca su di 30 aniversario na 2026. Durante e reunion, e ministernan a ricibi informacion tocante desaroyonan recien y tendencianan regional for di e director suplente di Wardacosta.

Cooperacion regional entre polis y servicionan di bombero a keda describi como un fundamento di resiliencia y seguridad den e parti Caribense di Reino. Structuranan existente, manera e Colegio di Hefenan di Polis, ta sigui haya sosten di tur cuater pais. Hulanda a confirma cu su contribucion structural anual di €3.5 miyon na cooperacion regional lo sigui for di 2026 pa dilanti.

Tambe a reporta progreso den e area di cooperacion di servicio di bombero. Ministernan a yama bon bini na pasonan pa un acuerdo di cooperacion renoba y e desaroyo di un proposicion pa un secretaria di sosten. Ta spera un decision formal riba e palabracionnan aki na e proximo JVO.

E intercambio y procesamento di informacion y datonan hudicial tabata otro punto clave di agenda. Ministernan a discuti esfuersonan pa harmonisa cuadro di proteccion di dato den henter Reino, describiendo e proceso como urgente pero compleho debi na diferente contexto huridico, organisatorio y procedemento den cada pais.

Ademas e discusionnan a enfoca riba coordinacion di uso di datonan hudicial pa emision di Certificadonan di Conducta (Verklaring Omtrent het Gedrag, VOG). Hulanda tin como meta pa lansa un consulta publico na comienso di 2026 riba concepto di legislacion cu ta permiti intercambio di datonan hudicial entre Hulanda Europeo y e parti Caribense di Reino pa metanan di VOG. Amiendanan legislativo paralelo ta ser prepara den e otro paisnan.

Manera ta custumber, e ministernan a revisa plannan anual, relato, presupuesto y pronosticonan di varios instituto conhunto, entre otro RST, Oficina di Fiscal General, OM Carib, Conseho pa Aplicacion di Ley, Corte Comun di Husticia y Fundacion pa Maneho di ICT den Aplicacion di Ley (SBIR).

Caminda tabata posibel, Hulanda a provee ​​aprobacion formal pa e documentonan aki durante e reunion. Den casonan caminda no a yega na consenso ainda entre tur pais, ministernan a urgi pa resolucion rapido pa garantisa continuidad y funcionamento stabiel di e institutonan aki.

Ademas di e puntonan di agenda formal, e JVO a bay compaña pa un retiro strategico cu a permiti ministernan participa den discusionnan mas amplio y cu ta wak pa futuro. Topiconan a inclui e importancia strategico di e Colegio di Hefenan di Polis y e necesidad pa mantene posicionnan di informacion fuerte pa contraresta crimen organisa.

E proximo Justitieel Vierpartijenoverleg ta programa pa 3 di september 2026 na Corsou, caminda tambe ta plania un otro sesion strategico. Ministernan tin confiansa cu dialogo y cooperacion continuo lo sigui fortalece husticia y seguridad den henter Reino.