(AFP)—Regulacionnan nobo a bay den efecto dialuna na Britania unda ta prohibi avisonan riba television y online pa cumindanan ultra-procesa, conoci mas bon como ‘junk food’, den loke gobierno ta yama un “accion cu lo lidera mundo” pa aborda obesidad infantil.
Ta anticipa cu e prohibicion—dirigi riba avisonan pa productonan cu hopi vet, salo of sucu—lo kita te cu 2,7 biyon caloria for di dieta di muchanan tur aña, segun e ministerio di Salud. Impactando avisonan cu ta pasa prome cu 9or di anochi riba television y na cualkier momento online, e lo reduci e cantidad di mucha bibando cu obesidad pa 20.000 y lo duna casi 2,7 biyon dollar den beneficio di salud, e ministerio a agrega.
Gobierno ta argumenta cu evidencia ta mustra cu avisonan ta influencia loke y ki ora muchanan ta come, formando preferencia for di un edad jong y aumentando e riesgo di obesidad y malesanan relaciona.
E ta nota cu 22% di mucha cu ta cuminsa scol primario na Inglatera—tipicamente rond cinco of seis aña—ta sobrepeso of obeso, subiendo pa mas cu un tercera parti pa ora nan progresa pa scol secundario na edad di 11 aña.
“Por medio di limita avisonan pa junk food prome cu 9or di anochi y prohibi avisonan paga online, nos por reduci exposicion excesivo na cumindanan no saludable,” minister di Salud Ashley Dalton a bisa den un declaracion.
El a agrega cu e decision tabata parti di un strategia pa pone e seguro nacional (NHS) enfoca riba prevencion como tambe tratamento di malesa, “pa asina hende por biba mas saludable.”
