(AP) — Prome minister Britanico, Rishi Sunak a bisa dialuna cu gobierno lo haci “loke sea necesario” pa protege e pais, mientras Reino Uni a anuncia un revision di seguridad despues cu a tira abao varios obheto no identifica for di shelo na Nort America.
Contestando tocante e obhetonan, Sunak a bisa cu e no ta bay “comenta den detaye riba asuntonan di seguridad, pero hende mester ta sigur cu nos tin tur capacidad na su lugar pa tene e pais safe,” incluyendo un forsa di reaccion rapido di fighter jet Typhoon.
Secretario di Defensa, Ben Wallace a bisa cu “Reino Uni y su aliadonan ta bay revisa kico e intrusionnan aereo aki ta nifica pa nos seguridad.”
El a bisa cu “e desaroyo aki ta otro señal di con e imagen di menasa global ta cambiando pa pio.”
Fighter jetnan Mericano a tira abao un obheto riba Lake Huron diadomingo – e di cuatro situacion asina na Merca y Canada e luna aki. Dia 4 di februari, ehercito Mericano a tira abao loke oficialnan a bisa tabata un blaas di spionahe Chines riba e costa di South Carolina despues di track esaki pa varios dia door di Nort America.
Riba diabierna, jetnan F-22 a tira abao un obheto “tamaño di un auto” den espacio aereo Mericano riba e costa di Alaska, y riba diasabra, prome minister Canades, Justin Trudeau a bisa cu el a duna orden pa un avion di guera Mericano tira abao un obheto no identifica – describi despues como un blaas – riba e teritorio Yukon den nort west di Canada.
E obheto cu a tira abao diadomingo a keda describi como octagonal, cu lasonan colgando, pero no tabatin carga discernible.
E tres obheto tabata hopi mas chikito, di apariencia diferente y a bula na altitudnan mas abao cu loke ta sospecha ta e blaas di spionahe – un di loke oficialnan Mericano a bis ata un flota di blaasnan di vigilancia aereo Chines dirigi na mas di 40 pais durante varios aña.
China ta bisa cu e blaas tabata un aeronave meteorologico civil cu a bula for di su ruta.
Minister di Transporte Britanico, Richard Holden a bisa dialuna cu tabata “posible” cu China a bula blaasnan di spionahe riba Reino Uni. El a bisa cu Reino Uni ta bay deal “robustamente” cu China, cual el a yama un “estado hostil.”
Un oficial senior di ehercito Mericano a bisa diadomingo cu parti di e motibo pa e tiramentonan ripiti ta un “alerta eleva” y scrutinio di shelo mas di cerca despues di a descubri e blaas spion. Oficialnan di Pentagono ta bisa cu e tres obheto cu a tira abao no ta presenta ningun menasa pa seguridad, pero te awo, tiki ta conoci di nan y e oficialnan no a descarta nada – ni sikiera UFO.
