Rene ‘Baba’ Herde a huramenta como minister den Gabinete AVP-FUTURO

Ayera, den presencia di Prome Minister mr. Mike Eman y Minister mr. Wendrick Cicilia y Secretario di Conseho di Minister mr. Indra Hassell-Duarte, a tuma luga e huramentacion di drs. Gervais Rene Herdé door di Su Excelencia Gobernador Alfonso Boekhoudt.

Despues cu Parlamento a aproba e credencialnan di drs. Herdé, un rato despues na Cas Ceremonial, Sr. Herdé a huramenta como e siguiente Minister di Infrastructura, Energia y Telecomunicacion y ta bira e di siete minister di Gabinete AVP-Futuro.

Prome Minister Eman a sigura cu e encargo ta den man di un persona cu hopi capacidad, dedicacion y devocion, cu un carera largo den politica y cu a sirbi su pais dignamente. Sr. Gervais “Baba” Rene Herdé lo fungi como Minister di Energia mientrastanto cu e candidato ing. Mike de Meza, ta resolve e obstaculo pa e por ta ministeriabel. A pesar cu e proceso por tuma tempo, tin speransa cu ing. De Meza ainda por tuma e cargo como Minister di Energia.

Oposicion kier a mira un minister mas jong
Partido den oposicion den Parlamento, MEP, tabatin diferente critica den sala di parlamento ayera. Pa cuminsa, a critica e hecho cu a yama e reunion pa nombramento di Sr. Herde “na ultimo momento” y cu a duna apenas tres minuut pa cada orador.

“Nos a haya e reunion berdad, pero manera bo sa, bo mes tabata presente, no ta djis hisa benta,” presidente di Parlamento, Sr. Marlon Sneek (AVP) a contesta. “Prome cu mi a tuma e decision mi a wak sala, y bisa si nos por yama e OV di biaha. E cooperacion tabat’ey, y p’esey nos a yam’e.”

Den su discurso, parlamentario Edgard Vrolijk a menciona cu el a manda un carta, “pero e carta nan no kier pon’e.” El a enfatisa cu partido MEP no tabata di acuerdo cu e nombramento di Sr. Herde, sino cu a aprob’e cu e 12 voto di fraccionnan AVP y Futuro.

Hopi di e critica di partido MEP tabata riba edad di Sr. Herde, e hecho cu e no tabata riba lista di AVP den ultimo eleccion, y cu e ta pensionado y tin cuatro pensioen caba. “Nan por a pone un hende cu hopi mas energia pa por a haci e trabao aki,” parlamentario Xiomara Maduro a comenta.

“Bo ta laga un pensionado di 4 pensioen, ya caba retira di politica, no a bay den ningun lista politica, no tin niun voto den AVP den ultimo eleccion aki, anto bosonan ta grita voor?” Endy Croes a agrega.

Sr. Vrolijk a bisa cu ta considera e nombramento di Sr. Herde como un “brevet van onvermogen” riba e politiconan hoben di partido berde. El a menciona parlamentario Stephany Sevinger, entre otro parlamentario hoben, bisando cu “awe a haya un brevet van onvermogen cu nan no ta sirbi pa goberna e pais.” Vrolijk a comenta cu el a scucha lider di fraccion Futuro, Sr. Gino Goeloe, bisa cu no a nombra e parlamentarionan jong pasobra “nan no tin experiencia.”

“Un berguensa bisa Sr. [Clifford] Heyliger, un persona cu tanto aña ta traha den WEB, cu amplio conocemento, no tin niun experiencia?” Segun Vrolijk, “un cos ta constata, e Old Boys ta manda keto bay riba e jongnan. E Old Boys Club, Baba, Benny, Dowers, Mike Eman, e grupo ey ta manda keto bay, nan ta dicta y pone ken e ta.”

El a menciona parlamentarionan di AVP, Otami Thomasia, Heyliger y “hasta Sr. [John] Hart” como parlamentarionan cu lo a pasa screening, pero cu a laga nan afo pasobra lo no tin experiencia. Pero “nan a duna Sr. [Wendrick] Cicilia, un hoben cu no tin experiencia, e trabao; pasobra Sr. Goeloe ta bisa, no, Cicilia ta prepara, pero esunnan mi tras kinan niun no ta sirbi, niun no tin esey.”

Parlamentario Endy Croes tambe a critica cu no a duna un hoben e posicion. “Nos ta lamenta masha hopi – tabatin un comision central un rato prome cu esaki – nos a mira cada candidato di AVP, e hobennan cu a priminti den campaña cu nan ta bay hiba un politica moderno, un politica nobo, nan ta distancia di e politica bieu di AVP, y awe nan tur a grita ‘voor’ pa Baba Herde bira minister dilanti cada un di nan. Un persona di 70 aña plus, un persona cu cuatro pensioen, y un persona cu a goberna den e sistema bieu, net den contrario di locual esakinan ta para p’e,” el a bisa.

Den su comentarionan, parlamentario Evelyn Wever-Croes a agrega cu “como lider di partido mi ta haya esaki si un bofta grandi den cara di tur e hobennan riba lista di AVP. Y nos ta mira hendenan cu hopi experiencia, cu conocemento cu por a ocupa e funcion aki, pero a wordo hala un banda pa un pensionado bin tuma e posicion ki.”

“A laga San Nicolas cay”
Otro punto cu Fraccion MEP a trece dilanti ta e votadornan di San Nicolas.

“Naturalmente awe, e decepcion mas grandi ta San Nicolas,” Vrolijk a bisa.

Parlamentario Endy Croes a agrega cu “ta lamenta cu San Nicolas no a haya su minister manera a wordo priminti.” El a menciona cu Sra. Otami y Sr. Heyliger “di pariba a para band’i De Meza” – kende no tabata presente den sala di Parlamento – pero cu “awe ambos a laga Mike de Meza cay, ambos a laga San Nicolas cay, ningun di dos tabatin curashi di para ‘kiden y para pa San Nicolas.”

Croes a menciona tambe cu De Meza tabatin “1476 voto pariba, Otami cu Heyliger cu riba 600 voto pariba, hunto riba mas cu 2mil voto di San Nicolas, awe ta vota contra San Nicolas. Nos ta lamenta cu nan ta sostene e politica di Avestruz aki, e politica bieu aki den e caso aki.”

Croes a lamenta tambe cu den partido AVP “ta mira diferente cara cu tin preparacion, cu tin e potencial pa asumi e funcion di un minister di energia y infrastructura, entre otro, pero awe nan a scoge nan politica, nan cartera, ariba San Nicolas, ariba Mike de Meza, djis pa complace cu AVP.”

Di su banda, Maduro a bisa cu AVP, cu “un di su bastionnan importante” di voto ta San Nicolas y cu tin parlamentarionan di San Nicolas tambe den sala, “awe ta laga un candidato di San Nicolas cay, Sr. De Meza, pa asina eynan nan acomoda un otro persona, Sr. Baba Herde, no pasobra cu e lo ta e miho candidato, sino cu pasobra cu el a pasa e proceso di screening caba.”

Sra. Maduro a critica cu AVP a campaña bisando “cu nan ta duna hobennan oportunidad y otro banda tin hopi hoben cu ta prepara, hendenan tambe di San Nicolas cu ta prepara,” pero na final no a nombra nan.

“No tin liderazgo, no tin gobernacion, no tin transparencia”

Parlamentario Evelyn Wever-Croes a bisa cu e reunion tabata uno “extraordinario” y cu a “wordo yama riba man,” bisando cu e ta “spera Sr. Presidente cu e mesun velocidad cu bo a yama e reunion aki bo por yama tur e reunionnan cu nos a pidi ya pa tres luna y cu no a wordo yama.”

Esey tabata comienso di un discurso yen di critica pa e gabinete actual. “Desde cu nos a sali di gobierno mas cu 100 dia pasa, no tin liderazgo, no tin gobernacion, no tin transparencia, Sr. Presidente, pasobra nos fraccion tin mas di 800 pregunta haci cu no a haya contesta. Coalicion di AVP-Futuro tin mas di 200 pregunta haci sin haya contesta, y bo no ta haya cu e ministernan no ta ni contesta nos, ni bin reunion pa duna informacion. Falta di liderazgo, falta di transparencia.”

Cla pa traha
A pesar di tur e critica, Sr. Herde a keda huramenta ayera tardi como minister di Infrastructura, Energia y Telecomunicacion. Minister Herdé a duna di conoce cu e ta cla pa traha. Segun Minister Herdé, e no ta un ofensa pa ta un pensionado, haciendo referencia na e critica. Minister Herdé sigur no tin miedo pa traha cu e generacion hoben, ta habri pa ideanan nobo y ta conta cu sosten grandi tanto den partido como den parlamento, segun el a bisa den un comunicado di prensa.