Departamento di Obra Publico (DOW) ta desea di informa comunidad di Aruba cu entrante diasabra 13 di september 2025 lo cuminsa cu e proyecto di renobacion di e brug banda di Wilhelmina Park.
E trabaonan lo tuma lugar na banda y abao di e brug den e lagun. Pa haci esaki lo pone 2 dam temporalmente cada banda di e brug pa saca e awa abao di e brug.
E trabaonan cu ta bay tuma lugar ta drechamento di e concreto y hero nan cu durante aña nan a daña y a cuminsa brokkel af, (betonrot). Tambe lo bay pone un tuberia pa rioolering nobo den lagun y lo instala un reling nobo y verf e brug.
E trabaonan relaciona cu e proyecto di renobacion di brug di Wilhelmina Park, lo tin den total un duracion di 60 dia di trabao.
Nos ta pidi bo(so) persona comprension y cooperacion pa e trabaonan cu mester tuma lugar y ta pidi disculpa pa cualkier inconveniencia cu por surgi. Alabes, DOW a nota cu e saconan blanco cu por mira den e area ta e materialnan cu ta bay usa den e renobacion.
