(AFP)—Gobierno Checo demisionario a bisa diaranson cu el a aproba e uso di psilocybin—e ingrediente activo den magic mushrooms—pa propositonan medico cuminsando 2026. Varios pais recien a legalisa e uso pa psikiatranan di e compuesto halucinogenico natural, incluyendo Nueva Zelanda e aña aki.
Legisladornan den e Republica Checo—un miembro di Union Europeo y NATO cu tin 10,9 miyon habitante—a legalisa e uso di psilocybin na mei, den un amienda na e codigo penal cu tambe a relaha reglanan relaciona cu posesion di marihuana.
E decision di gobierno, cual ta establece e reglanan pa e uso di e droga, ta permiti psikiatranan y psicoterapistanan pa administra psilocybin si “tratamento pa substancia medico registra no ta eficiente of si proba un intolerancia pa esaki.”
Nan por tambe usa psilocybin pa trata depresion relaciona cu cancer, depresion clinico serio sin sintoma psicotico y un condicion mental empeora cu ta menasando bida di e pashent.
Minister di Salud Vlastimil Valek a elogia e decision como beneficioso pa “e sistema di salud Checo, e experto publico y pashentnan.”
Den e ultimo añanan, e posibilidad terapeutico di substancianan psicodelico manera psilocybin, como tambe LSD y MDMA, a causa un renobacion di interes entre cientificonan pa trata depresion y adiccion.
Nueva Zelanda a aproba e uso di psilocybin pa tratamento di depresion na juni. Alemania a permiti dos clinica pa usa psilocybin dentro di un “programa di uso compasiona,” e prome di e tipo aki den EU, na juli.
Dokternan Checo tabata permiti pa prescribi cannabis medico desde 2015, y tratamento cu cannabis ta cubri pa seguro di salud publico desde 2020.
Gobierno di coalicion centro-derecha di Petr Fiala a tene su ultimo reunion diaranson. E lo baha pa un gabinete di coalicion nobo lidera pa biyonario Andrei Babis, cual mester huramenta dialuna binidero despues di un eleccion parlamentario na october.
