(DiarioLibre) – Presidente Luis Abinader ta wak como algo positivo e publicacion di un rapport di auditoria di e Contraloria General de la Republica na e Cuerpo di Seguridad Presidencial (Cusep), algo cu, pa su persona, su gobierno ta mustra loke ta bon y loke mester coregi.
“Pa prome biaha den 94 aña cu e Contraloria tin, nos den e Presidencia di Republica Dominicana nos a bisa pa publica e rapport pa e pueblo conoce den kico nos ta inverti nan recursonan,” el a remarca.
E mandatario a afirma cu “e ta un promesa cu nos a haci den nos campaña, pero, ademas, un compromiso personal cu ami tin cu e pais di bisa e poblacion Dominicano nan recursonan, loke nan ta paga den impuesto, den kico e ta wordo inverti y con nos ta gastando e.”
“Y eynan obviamente, pa prome biaha, den un gobierno cu ta transparente cu ta bisa loke ta bon y cu tambe ta publica e cosnan cu nos tin cu coregi,” el a sostene.
Abinader a splica cu e Contraloria ya a traha cu Cusep pa resolve e iregularidadnan.
“Eynan mester analisa. Ya e Contraloria durante tur e tempo ta trahando cu cada institucion pa mehora nan controlnan pa asina mehora tambe den tur aspecto di tal manera cu cada cen di e pueblo Dominicano ta wordo inverti corectamente,” el a subraya.
E hefe di Estado a reacciona na e tema den un rueda di prensa na e Polis Nacional, despues di termina un reunion cu e mandonan policial y militar, y cu e Ministerio Publico, pa conoce e evolucion di e estadisticanan ariba seguridad ciudadano.
