(DiarioLibre) – E Defensor di Pueblo di Republica Dominicana, Pablo Ulloa, a anuncia cu su oficina ta trahando riba un estudio di diagnostico di desaparicionnan involuntario den e pais. El a splica cu e obhetivo ta pa compronde miho e alcance di e fenomeno, su causa, y e contesta institucional.

E iniciativa ta surgi for di varios caso recien cu a genera preocupacion den sociedad, incluyendo e desaparicion di e muchanan Roldanis Calderón, na Los Tablones de Manabao, provincia di La Vega; y Brianna Genao, den e municipio di Imbert, provincia di Puerto Plata.

Ulloa a splica cu e estudio lo ser realisa den coordinacion cu Programa di Desaroyo di Nacionnan Uni.

El a detaya cu e investigacion lo consisti di un estudio diagnostico integral cu lo combina varios fuente di informacion pa medio di triangulacion metodologico.

Entre e medidanan cu a sobresali tabata e revision di cuadro legal y literatura specialisa riba desaparicionnan, y tambe e analisis di datonan oficial di 2025 suministra pa Polis Nacional.

Ademas, un encuesta lo ser administra na miembronan di famia di personanan perdi—principalmente miembronan di e Asociacion Dominicano di Famianan di Desaparecidonan—pa midi e impacto economico, social y emocional di e casonan aki y evalua e contesta di autoridadnan.

Segun Ulloa, un di e problemanan principal identifica ta e falta di compatibilidad entre institutonan envolvi den e buskeda di personanan perdi den e pais, manera Polis Nacional, Defensa Civil y Bombero.

Den su opinion, e deficiencia aki ta limita e capacidad pa responde na e casonan aki.

Defensor di Pueblo a señala tambe cu hopi warda di polis ta confronta limitacionnan tecnologico. El a splica cu tin mas di 700 warda di polis den e pais, di cual poco mas cu 100 a ser renoba of ta den mihor condicion, strobando implementacion di un sistema pa responde na emergencia of desaparicion.

“E falta di un sistema tecnologico integral ta limita nos habilidad pa atende e tipo di situacionnan aki,” el a señala.

El a expresa e necesidad pa mehora e capacidad di contesta di institutonan na prome instancia.

Ulloa a sigura cu Oficina di Defensor di Pueblo lo no cede den su esfuersonan di supervision pa garantisa proteccion di mucha y hoben.