(DiarioLibre/) – Horcan Fiona a laga bastante destruccion atras na Republica Dominicana, unda yobida torencial a percura pa inundacion y un segundo victima mortal den Caribe. Un hoben studiante femenino tabata core riba un motocicleta durante e horcan, ora un poste di electricidad a cay, cu resultado fatal.
Ministro di Presidencia, Joel Santos, a reuni diamars mainta cu otro autoridadnan na Ayuntamiento Municipal di Hato Mayor, pa coordina ayudo na persona y lugarnan afecta pa e horcan. Di acuerdo cu e reporte di gobernacion di e provincia, te na e momento ey tabatin nuebe lugar cu tabata funciona como albergue y mas di 400 persona damnifica. Sin embargo, den otro noticia tabata menciona cifra di 1.900 persona cu mester a bandona nan vivienda y ta alberga den refugio, mientras cu un minoria di casi 400 a haya refugio cerca famia o amistad.
E pais a sufri menos daño na su infrastructura di electricidad cu e bisiña isla Puerto Rico, cu a sufri un collapse total di e red nacional. Na Republica Dominicana ta anticipa cu 80 % di e red lo ta den operacion atrobe mesora, y e faltante 20% den e proximo dianan. Sin embargo, como un miyon di persona a keda sin acceso na awa potable.
Presidente Luis Abinader tabata diamars mainta na municipio Higüey y a recore parti di e zona pa supervisa e dañonan causa pa horcan Fiona. Abinader a declara di ta studia e posible biahe pa New York pa ta presente na Organizacion di Nacionnan Uni, cu ta celebra inauguracion di su Asamblea General, pero a bisa cu su prioridad ta e temanan na su pais, pa paso di e horcan. Fiona a continua su ruta rumbo pa Turks & Caicos y Bahamas, mientras tanto cu forza di categoria 3, cu biento di maximo di 185 km pa ora.
