E siman aki, residentenan di Seroe Colorado a trece dilanti nan preocupacion tocante e estado den cual nan comunidad ta, haciendo un yamado pa gobierno tuma accion pa mehora infrastructura kibra, atende cu e riesgo pa seguridad pa residente y turistanan, y haci algo cu e varios cas cu ta keda bandona y den decadencia.

Figura conoci den comunidad di San Nicolas, Sr. Hilario Doncker, a comparti riba su pagina un serie di publicacion subrayando e diferente preocupacion cu residentenan a trece dilanti den e ultimo dianan. Manera e publicacion ta bisa na principio, e grupo di residente cu ta haciendo yamado pa accion ta representa pa un miembro di directiva di e Asociacion di Habitante di Seroe Colorado. A enfatisa cu esaki no ta prome biaha cu a trece e asuntonan aki na gobierno y hasta cerca representantenan di Cuerpo Policial. A pesar di e esfuerso incansable, hopi di e problemanan cu tin ta keda sin haya resolucion, e publicacion ta bisa.

Casnan bandona

Pa prome, Seroe Colorado tin un problema significante di casnan bandona. Esaki ta casnan cu a keda di loke anteriormente tabata e Seroe Colorado Colony den tempo di LAGO. Awendia, mayoria cas construi den e comunidad—for di casi 350 tempo Colony tabata mas biba aden—a keda den decadencia y mayormente bandona. Pa e comunidad cu ainda ta biba den e area, e mal estado y abandono di e casnan aki ta un di e problemanan mas grandi cu nan ta enfrenta. Pa mas cu 30 aña, mayoria propietario di e casnan aki no ta paga erfpacht of grondbelasting. Segun e residentenan a calcula, esaki por conta pa mas cu tres miyon florin perdi. E perdida aki ta crea mas frustracion ora ta corda e escasez di vivienda pa localnan riba e isla.

Tambe nan ta expresa cu hopi cas bendi den e area ta keda destina pa stranheronan cu durante gran parti di aña no ta ni biba den nan cas. Otronan, segun e grupo ta bisa, a converti nan cas den Airbnb.

E residentenan ta puntra pakico ainda no a reclama e casnan aki y haci nan disponible pa famianan local cu actualmente ta riba lista di espera pa haya cas. Di nan banda, nan ta propone cu si propietarionan ta keda sin paga belasting riba e tereno pa tres aña of mas, gobierno mester por reclama e derecho di propiedad pa asina duna tereno na otronan cu si lo cumpli.

E mesun pregunta aki tabata central den e proyecto di Burubundu na Pos Chikito, unda hopi hende tambe a puntra pakico no por tuma terenonan bandona y bende esaki na localnan. Minister di Infrastructura, Rene “Baba” Herdé a tuma nota di e preocupacion aki pa loke ta trata Burubundu, y a splica fin di juni riba su pagina di Facebook cu pa tuma y (re)bende e terenonan aki no ta asina simple.

Manera el a splica e tempo ey, gobierno no tin control pa e casnan aki, principalmente pasobra aki sa trata mayormente di terenonan priva cu a keda den famia pa varios generacion. Hopi biaha e terenonan aki ainda ta den disputa den famia, unda kisas rumannan no a yega na acuerdo ainda kico pa haci cu ne. Pa casnan bandona na Seroe Colorado, e situacion por ta similar.

Pa loke ta erfpachtnan bashi of sin desaroyo unda propietarionan no ta cumpliendo cu e proposito di erfpacht, e minister a splica cu un tereno di erfpacht ta ser duna pa 60 aña y ta un derecho legal, pues gobierno no por tuma esaki back facilmente.

E mandatario a conta cu den pasado gobierno a haci un “intento activo” pa tuma e terenonan aki, pero e proceso legal pa haci esaki ta hopi largo.

Infrastructura kibra

Un otro punto di preocupacion tabata infrastructura kibra of daña den e area. Ta conoci cu e caminda bayendo Baby Beach ta den mal condicion, algo cu pa hopi aña a keda asina. For di e crusada banda di e museo di trein te na entrada di Baby Beach, chauffeurnan ta enfrenta buraconan grandi y un caminda cu no ta flat y facil pa core riba dje mas. E residentenan tambe ta punta na e aumento di trafico den e area despues cu a construi un hotel nobo dilanti Baby Beach, splicando cu e trafico a crea riesgo di seguridad pa peatonnan den e area pasobra no tin suficiente trottoir pa nan por cana di manera sigur.

Relaciona cu asuntonan di seguridad, e residentenan a nota cu aunke a priminti un caminda di emergencia via e tereno di LAGO, esaki nunca a ser cumpli. E comunidad tampoco a mira e warda di polis cu nan a ser priminti ni tampoco facilidad pa personal di Guarda Nos Costa, KPA of marinierskazerne entrena.

Ademas, a mustra con piernan den area di Roger’s Beach a keda den deterioro—piernan usa pa piscadornan por yega na nan lancha.

E residentenan ta sugeri cu parti di e ganashi ricibi for di benta di tereno den e area por ser inverti den mehora e caminda y infrastructura na Seroe Colorado, incluyendo construi un caminda nobo via e tereno bieu di LAGO, e publicacion ta bisa.

Calidad di bida a bay atras

Calidad di bida na Seroe Colorado en general a bay atras, e residentenan ta splica. Esaki pa via di e zonido constante for di eventonan di bingo, musica duro y otro disturbionan manera holor stinki of problema cu presion di awa cu ta ser causa pa e hotel den bisindario.

E situacion di Baby Beach y santana di cacho tambe ta stroba e calidad di bida den e area. E residentenan ta considera cu desaroyo turistico nunca a tene cuenta cu e habitantenan cu ta biba den e area, enfatisando cu actividadnan hotelero ta tumando luga hopi cerca di e comunidad civil. Nan opinion ta cu mester a construi e hotel mas leu for residencianan.

E santana di cacho banda di Baby Beach tambe ta presenta un riesgo pa medio ambiente, segun e residentenan ta bisa. Nan a propone den pasado pa establece un sitio di conmemoracion pa e mascotanan fayecido y instala camara di seguridad pa preveni mas abuso. Sinembargo, autoridadnan ainda no a tuma accion concreto.

Cu e yamado pa accion aki, e residentenan di Seroe Colorado ta spera cu autoridadnan por reanima combersacionnan tocante e desaroyo di nan comunidad.

Nota di redaccion: Potretnan ta di Sr. Hilario Doncker riba Facebook.