E sorpresa grandi siman pasa tabata e anuncio di e bendedornan di combustible cu nan no ta acepta pago cu carchi Debit/Maestro di banco mas. Den un comunicado amplio nan a splica cu nan accion ta un reaccion riba e decision di banda di banconan, cu nan ta bay cobra 0,75% riba cada suma di transaccion na pomp.

E accion di e banconan no tin ningun consecuencia pa otro sector, pasobra nan por incorpora esaki den nan prijs, y finalmente e cliente, cu e kier of no, ta paga esaki. E cliente, a proposito, por evita di paga e gasto extra aki pagando cu placa cash, den cualkier negoshi, loke ta sucediendo bastante ainda.

 

Contrario na otro sector economico, desde antaño ta considera suministro di combustible algo di importancia asina grandi, cu e ta suheto na regulacion completo di banda gubernamental. E consideracion aki ta conta tambe pa otro producto esencial, manera awa y electricidad. Ta pesey e maneho di gobierno(nan) tabata pa concentra produccion y suministro den empresa di monopolio. Esey ta conta tambe pa combustible, cu anteriormente tabata regula caba pa gobierno, pero awor e unico proveedor local ta un empresa 100% estatal (Refineria di Aruba y su subsidiario FMSA).

Di otro banda, e suministro final na consumidor ta den man di empresa priva, cu ta competi den un espacio limita pa gobierno, cu ta establece prijs y margen di ganashi. Lo ta mihor den e cuadro aki pa no papia di margen di ganashi, pasobra loke e suma pa cada litro di gasolin (14,5 cent) cu e distribuidor final ta resta despues di paga gobierno y FMSA, no ta ganashi sino e suma di cual nan mester paga tur cos ainda. Pues no ganashi, sino ‘detailhandelsmarge’ na bon Hulandes.

Si banconan awor ta pretende di por tuma pa nan un parti di e margen chikito aki, pa cubri nan gastonan di servicio di transaccion digital, ta di comprende cu e distribuidornan ta cuminza tuma accion pa defende nan negoshi. Sin embargo, ni banco ni distribuidor di combustible por yega na acuerdo satisfactorio, pasobra e papel principal den e asunto aki ta di gobierno. Gobierno a tuma e decision strategico den pasado, pa bon motibo, pa structura henter e sector pa preveni e desvionan serio cu por surgi si laga e distribucion liber segun ley di mercado, pero awor mester responde tambe pa regla e asunto aki na un manera satisfactorio. Esey ta loke mester sucede den e dianan nos dilanti, nada mas ni nada menos.

Sin embargo, haciendo esey, tin algun punto importante pa tuma na cuenta. Un di nan ta e politica en general cu gobierno lo ta hibando pa limita gradualmente uso di placa cash. Esey di un banda pa evita y limita mas tanto posible labamento di placa y financiamento di terorismo, manera gobierno ta obliga di haci segun e compromisonan internacional cu tin riba e tereno aki. Y, seguidamente, esaki tambe lo beneficia tur negoshi pasobra ausencia di placa cash ta limita e posibilidad di asalto arma riba negoshi. Pero, aki atrobe no lo yega asina leu si no tin cooperacion di varios banda. Nos por observa por ehemplo cu tin hopi negoshi chikito o mediano cu no ta yega na un cantidad minimo di transaccion pa hustifica e gastonan halto di un sistema POS di pago digital. Hopi di nos conoce e problema ora mester paga un mecanico, algo cu por core den varios miles di florin, y no tin un modo pa paga esaki al instante por via digital. E negoshi no tin POS pero por tin pago di diezmiles riba mesun dia cu ta tuma lugar tur den cash. Si tin e deseo pa avanza den esaki anto lo mester bin un acuerdo – nacional – cu tur empresa ta haya acceso na POS pa un suma razonable, cu e condicion cu no ta acepta placa cash mas di nan. A proposito, lo por di biaha tambe regla cu tur ciudadano ta haya y mester tin un cuenta bancario, na un prijs razonable. Esaki ta e decisionnan strategico cu no por ta den man di sector priva, pero mester ta accion di e ministerio corespondiente.

Pero, den practica realmente gobierno ta siguiendo un maneho cu ta faborece gradualmente mas pago digital y menos uso di cash? No. Loke nos por observa te awor ta e litania di bon intencion ora tin bishita internacional cu ta bin check ta kico nos ta haci, pero ora nan caba di bay nos ta bolbe na ‘business as usual’. Y e business ey den practica ta cu pago digital ta pa esun cu kier y por afford e, creando un ‘no man’s land’ den cual nos ta bibando pa hopi aña caba.

Awor, ora gobierno sinta na mesa cu e otro dos actornan, banco y distribuidor di combustible, lo ta dificil imagina cu ta sali for di e asunto aki sin perdedor. Loke esun ta haya, un di e otronan lo mester entrega. Kico ta e posibilidadnan? Si gobierno acepta amplia e margen di detayista, esaki lo significa aumento di prijs pa e consumidor, a menos cu gobierno cede di su parti (accijns). Si e banconan insisti, e guera cu e bendedornan ta continua. Si e bendedornan insisti, banco y nan mes ta perde. Gobierno tambe pasobra si no ta yega na un solucion, cu no por bin di e otronan, e problema lo ta pa e mandatario. Accion anto.