Mi persona a observa cu Banco Central di Aruba (CBA), den un comunicado di prensa oficial den ambos Ingles y Papiamento, a menciona mi pa nomber. Debi na esaki mi lo kier tuma e oportunidad pa resalta e comunicado di prensa aki y tuma tempo pa reacciona riba esaki en combinacion cu publicacionnan oficial di CBA den pasado.

Den nan comunicado di prensa a nota cu e beleid di CBA ta basa “riba un marco di maneho analitico robusto”. Tambe cu e ARA metric ta na 132.8% na Maart 2025. Esaki ta e partinan gehighlight geel. En fin CBA ta nota cu mester usa nan publicacionnan oficial pa informacion corecto.

Na prome lugar kier presenta pagina 5 di CBA su mesun Economic Outlook di Februari 2025, den e publicacion oficial aki nos por nota cu “Figuur 3”, tin literalmente foutnan den e staafdiagrammen si nos wak 2024Q2 (155.2) versus e otro kwartaalnan. Mi kier enfatisa cu e fout na e nivel aki, ta den un publicacion official di CBA.

Pero hopi mas preocupante pasobra si nos nota cu CBA ta usa “un marco di maneho analitico robusto” cu segun nan mesun proyeccion oficial pa Q12025 e ARA metric lo tabata na 137.2 segun e Economic Outlook Februari 2025. Awo ta resulta cu e ARA metric ta na 132.8% na Maart 2025 (Q1 2025) segun e comunicado di prensa di Mei 9 2025. Esaki ta un diferencia di casi 5% punto.

Den tur esaki e ta pone ami duda severamente den e calidad analitico y robusto cu CBA ta indica cu nan lo tin. Tambe nos mester nota cu e ARA metric di 132.8% ta prome cu April 2, e dia cu e tarifanan Mericano a wordo anuncia.

Den contexto aki, mi kier pone atencion riba un rapport amplio di Banco Central di Corsou & Sint Maarten (CBC&SM). Den e analisis amplio aki di e Banco Central di nos isla bisiña. Nos por wak cu den un scenario unda crecemento economico na Estados Unidos baha cu 1.2% y inflacion hisa na 4% cu esaki en berdad lo tin un impacto significante riba e “Imports Coverage Ratio” di Corsou. Tambe mester nota cu esaki lo tin su efectonan negativo te na aña 2028 segun e rapport aki di CBC&SM. Esaki ta un indicacion mas den mi opinion cu lo tin toch wel presion severo riba Aruba su reservanan monetario, si nos wak e calculacionnan di CBC&SM, cual ta un rapport cual CBA lo considera di “caliber halto”.

Den tur esaki mi ta haya cu e comunicado di prensa di Mei 9, 2025 cu CBA mes ta kies pa pone su mesun cara na berguensa den mi opinion y cu door di tipo di atakenan asina ta haci daño na nan mesun credibilidad publico. Esaki debi na foutnan di caliber inaceptabel den publicacionnan oficial, cual ta e grafico na pagina 5 di nan Economic Outlook di Februari 2025 y tambe den nan capacidad analitico door cu e ARA metric ya caba ta casi 5% mas abou cu nan mesun proyeccionnan di Februari 2025.