Desaroyo monetario

Den luna di februari 2023, e cantidad di placa den circulacion a expande cu Afl. 22,8 miyon te na Afl. 5.627,8 miyon, compara cu januari 2023. Esaki a resulta for di un subida den e reserva di divisa netto (+Afl. 25,2 miyon) y un bahada den e activo domestico netto (-Afl. 2,5 miyon).

Na februari 2023, e expansion den e reserva di divisa netto a wordo causa pa compra netto di divisa di Afl. 320,5 miyon di publico, principalmente relaciona cu entrada for di turismo. Esaki a wordo pa un gran parti mitiga pa benta netto di divisa di Afl. 295,2 miyon na publico, primordialmente relaciona cu pago pa importacion.

E desaroyo den e activo domestico netto a wordo causa pa un bahada den credito domestico (-Afl. 2.5 miyon). E reduccion den credito domestico a resulta for di menos credito bancario netto na e sector publico (-Afl. 13,9 miyon) y mas credito bancario na e sector priva (+Afl. 11,4 miyon). E contraccion den credito bancario netto na e sector publico ta wordo atribui na un subida den deposito di gobierno (+Afl. 14.0 miyon). E crecemento den credito bancario na e sector priva a wordo causa pa mas credito na hipoteca pa vivienda (+Afl. 9,1 miyon) y credito na consumidor (+Afl. 5,8 miyon). Di otro banda, credito na empresa (-Afl. 3,5 miyon) a baha. Transaccionnan no relata na credito a yega cero.

Inflacion

E nivel general di prijs, cu ta wordo midi door di e indice di prijs di consumo, a registra un subida di 7,1 porciento den e luna di februari 2023 compara cu februari 2022. E contribuyentenan principal na e aumento aki tabata e categorianan “Vivienda”, “Transporte” y “Cuminda y Bebida No-alcoholico” Pa loke ta trata e promedio anual di e tasa di inflacion, esaki a registra 6,1 porciento na februari 2023, compara cu 5,8 porciento na januari 2023.

Entrada di Gobierno

Entrada total di gobierno a suma Afl. 103,6 miyon na februari 2023, cual ta Afl. 21,5 miyon mas cu e mesun luna di e aña anterior. Esaki a resulta for di un subida den entrada di impuesto (+Afl. 25,6 miyon) y un bahada den entrada no relata na impuesto (-Afl. 4,2 miyon).

E aumento den entrada di impuesto a wordo causa principalmente pa mas entrada for di e asina yama “turnover tax” (B.B.O.,B.A.V.P.) (+Afl. 10,6 miyon), impuesto riba camber di hotel (+Afl. 6,5 miyon), impuesto riba importacion (+Afl. 5,3 miyon), impuesto riba divisas (+Afl. 4,4 miyon) y impuesto riba entrada (+Afl. 3,7 miyon).

Turismo

Na februari 2023, e cantidad di turista a registra 98.068 turista, cual ta 20.107 mas bishitante (+25.8 porciento) compara cu na februari 2022. E mercadonan Norte Americano, Latino Americano y Europeo a crece cu 16.057 bishitante (+24,4 porciento), 3.257 bishitante (+73,3 porciento) y 222 bishitante (+3,5 porciento), respectivamente.

Pa mas informacion of un analisis mas detaya, bishita e website www.cbaruba.org of tuma contacto cu e Departamento di Estadistica di Banco Central di Aruba via telefon na 525 2100 of e-mail na statistics.department@cbaruba.org.