Un consehero legal na e corte mas halto di Union Europeo a bisa ayera cu e reglanan di proteccion di data di e bloc mester preveni estadonan miembro di retene indiscriminadamente data personal captura for di companianan telefonico y di internet, hasta ora agencianan di inteligencia ta bisa cu seguridad nacional ta den riesgo.
Den un opinion no- vinculante riba con Corte Europeo di Husticia (ECJ) mester tuma decision riba asuntonan relaciona na acceso di agencianan di inteligencia riba data di comunicacion teni pa proveedornan di telecomunicacion, abogado general Campos Sanchez-Bordona a bisa ‘e forma y metodo pa combati terorismo mester ta compatibel cu rekerimentonan den ley’.
Comentando riba un serie di casonan di Francia, Reino Uni y Belgica – e tres pais victima di atake extremista den añanan recien cu a reforsa vigilancia – Sanchez-Bordona a bisa cu mester mantene e veredicto di casonan di ECJ. El a cita un caso den cual e corte a duna veredicto cu retencion general y indiscrimina di comunicacion ta ‘desproporciona’ y inconsistente cu directivanan di privacidad di UE.
E abogado general a recomenda acceso limita na e data, y unicamente ora ta esencial ‘pa prevencion efectivo y control di crimen y salvaguardia seguridad nacional’.
Privacy International, un organisacion caritativo promoviendo e derecho na privacidad, a trece e caso inicial. Referenciando e ley di caso di ECJ, a bisa cu e adkisicion, uso, retencion, revelacion, almacenahe y eliminacion di bulk di set di datonan personal y bulk di datonan di comunicacion pa agencianan di seguridad y inteligencia di Reino Uni ta ilegal bou ley di UE.
Tribunal di Podernan Investigativo di Reino Uni a referi e caso na ECJ, cu a tene un audiencia conhunto cu dos caso similar di Francia y otro di Belgica.
“Nos ta ricibi di bon manera e opinion awe di abogado general, y ta spera e lo ta persuasivo na e Corte”, segun Caroline Wilson Palow, Director Legal di Privacy International “E opinion ta un victoria pa privacidad. Nos tur ta beneficia ora cu schemanan di derecho robusto, manera e Charter di Derechonan Fundamental di EU, ta aplica y cumpli.”
Opinionnan legal di ECJ no ta legalmente vinculante, pero hopi biaha ta cumpli pa e corte. Servicio di prensa di ECJ a bisa cu ta spera un veredicto dentro di dos luna.
“Si e corte dicidi pa sigui opinion di e abogado general, ‘metadata’ manera data di trafico y ubicacion lo keda suheto na e nivel mas halto di proteccion den Union Europeo, hasta ora tuma acceso na nan pa proposito di siguridad nacional”, segun Luca Tosoni, investigado na e Centro Noruego pa Computer y Ley. “Esaki lo rekeri varios estado miembro – incluyendo Belgica, Francia, Reino Uni y otronan – pa haci amienda den nan legislacion domestico.”
