Recientemente, varios lector a acerca Redaccion di Bon Dia Aruba pa expresa disgusto pa e estado di limpiesa den Caya Grandi. Mientras cu tin esfuersonan andando di parti di gobierno y sector priva pa revitalisa e area comercial aki den centro di Oranjestad, ciudadanonan ta nota cu e parti di limpiesa no ta hayando su debido atencion.
Un lector a comenta cu net den temporada di fin di aña, cu lo por spera lo tin hopi hende bishitando Caya Grandi na Oranjestad pa un paseo, compras of un koffie, por a mira hopi sushi tira rond y bakinan yen, creando un ambiente desagradable.
Otro ciudadano a expresa preocupacion pa e imagen cu Aruba lo haya cerca turistanan, principalmente di crucero, cu nan introduccion na nos isla ta presenta esaki como descuida y sin atencion. E lector a comenta cu ta manera invita un hende bishita bo na cas, pa despues bo cas ta tur sushi.
Loke ta importante pa resalta ta cu esaki no ta un tarea solamente di gobierno. Mientras cu autoridadnan por haci mas pa zorg pa ploeg di limpiesa haci bakinan publico bashi, haci algun limpiesa den e area, y corta mata por ehemplo, ciudadanonan di nan banda tambe mester contribui door di deshaci di nan desperdicio di manera responsable, no djis benta cos riba caya of den mondi.
Tene Aruba limpi ta un compromiso di nos tur!
