Rey no por bishita… Nos mas frecuente…?

E proximo bishita di nos Rey ta pone nos pensa, y no solamente con pa ricibi e bishita manera mester ta. Mirando tur e berguenza cu ta surgi de repente pa asunto cu a neglisha pa tanto tempo, lo ta hopi efectivo pa haya bishita halto cu mas frecuencia. Asina por lo menos nos gobernantenan lo haya regularmente un recordatorio, cu no ta laga otro remedi cu simplemente cu loke semper tabata nan obligacion. Den cierto sentido nos gobernantenan ta parce un tata o mama, cu no ta mantene su cas na orden pa su yiunan, pero ora tin e ‘peligro inminente’ di bishita importante, panico pa drecha cas ta drenta y ta purba logra siquiera algo di apariencia ordena.

Actualmente, cu e bishita menciona na mente, por tende di e critica riba nos infrastructura, cu segun un bunita expresion hereda di Hulandes yama ‘na werki’. E asunto ta mas bergonzoso ainda, pasobra e responsabilidad di mantene un infrastructura aceptable, ni siquiera impecable, ta promer tarea di e mandatario encarga. Sin embargo, pa hopi aña caba nos por mira cu infrastructura ta parce un ‘sluitpost’ riba presupuesto gubernamental, cu ta haya atencion ora no por ignora cierto problema mas. No cu semper esey tabata asina, pero na Aruba nada ta parce permanente, sigur ora ta trata di algo bon o util. Asina mas di 20 aña pasa un mandatario a bin riba e idea pa institui un fondo special pa inverti den nos careteranan. Como cu finanzas semper ta mustra preta, e fondo no tabata alcanza pa cubri tur cos, pero tabatin algun resultado positivo. Awor claro, bo por bisa cu sin fondo special tambe bo por a drecha caretera, si como gobierno bo ta mira esaki como algo necesario. Esey ta berdad, pero ta hopi mas dificil competi cu otro necesidad den presupuesto, si no tin un fondo separa, cu recurso dedica unicamente na e meta ey. En todo caso, e inmenso sabiduria di e siguiente gabinete a pone un fin na e fondo special, cu hustamente e argumento cu por financia mantencion di caminda directamente for di presupuesto, no mester fondo separa. Y kico a pasa seguidamente? A introduci proyecto special cu, fuera di su utilidad indiscutible, a crea infrastructura nobo, pero no a atende e necesidad di mantene y renoba e infrastructura existente. Un ehemplo di esey tabata e caminda di Rooi Frances pa Sabana Basora, cu a haya renobacion parcial den e proyecto grandi di doble via te na Pos Chiquito, pero por lo demas a keda un desastre completo, sin cu aparentemente un persona tabata poni responsable pa esey.

Kico nos kier indica cu esaki? Cu en berdad no tin mester di fondo special, pero di cualkier manera un fondo asina ta enfatiza cu gobierno, mas exactamente e ministro responsable, ta consciente di su tarea y ta actua consecuentemente. E realidad di awendia sin embargo, ta cu comunidad mester warda y spera cu e mandatario en cuestion lo duna muestra di ta consciente di su obligacion, mientras cu ademas e banda politico semper ta spera gratitud di pueblo, pa trabao cu e mandatario mester considera na promer lugar su tarea ‘normal’. Esaki ta haci nos corda un Editorial di 9 aña pasa, den cual a elabora tocante e contraste entre e reputacion – bon mereci – di Aruba su turismo, y loke ta nos experiencia diario como ciudadano di trato gubernamental. Aki un parti di e texto ey: “Awor, nos no ta skirbi tur esaki pa desmenti o bagatelisa cu Aruba ta y tin un nomber eyfo. Loke nos kier ilustra ta e contraste entre loke ta propaganda y loke nos como ciudadano cu ta biba aki y ta move rond, den auto y ohala tambe mas na pia o riba bicicleta, ta mira a base diario. Loke nos ta sinti ora nos drenta mayoria di oficina gubernamental y ta spera di haya un trato …bueno, normal. Nada di otro mundo, pero un gobernacion cu ta haci cos, ‘normal’. Cu tin por ehemplo placa disponibel pa mantene caretera. Awasero a cay, sali bay drecha loke a daña. Y no spera elogio y gradicimento, pasobra ta bo responsabilidad como gobierno.”

Conlusion: no ta mira tanto cambio den casi un decada. Como ciudadano mihor bo percura pa bo tin un auto, pasobra cana banda di caminda, unda hopi biaha no tin siquiera algo cu bo por yama ‘acera’, ta mas bien busca problema pa bo mes, sigur si bo ta un persona di edad. Awor, combina esey cu mal iluminacion riba caya y e hecho cu a pesar di inspeccion di vehiculo, di manera inexplicable mitar di Aruba ta core rond cu un vehiculo cu su dimlight ta mustra pa cielo, creando peligro pa e trafico contrario. Nos tur a custumbra caba cu esaki ta ‘normal’?

Nos por menciona hopi mas ehemplo di asunto cu no tin un atencion ‘normal’ pero esey no ta añadi argumento. Mas importante ta: ki dia comunidad ta cuminza exigi di nos gobernantenan pa nan atende cu prioridad e cosnan normal, cu ta afecta bida diario di un cantidad di ciudadano. Esey ta significa cu nos, como e yiunan den e comparacion haci na inicio, ta exigi cu mester por biba den un cas ordena, y no un desorden cu ta depende di bishita di alcurnia pa causa berguenza momentaneo, pa despues bolbe na e (des)orden di custumber. Bo bishita di alto nivel ta demasiado diplomatico pa bisa cu e lugar ta desordena, ta bo propio hendenan mester haci esaki. Rey mester ta bonbini semper, pero no pa pone cos ‘normal’ cana…