Durante su bishita oficial na Aruba pa celebracion di Dia di Himno y Bandera, Su Mahestad Rey Willem-Alexander a hiba palabra durante acto protocolario den cual el a trece dilanti un mensahe di orguyo, unidad y reflexion, subrayando tanto e progreso cu e isla a logra como e retonan importante cu ta para dilanti.

“Ta asina dushi pa ta back na Aruba. Hunto nos ta celebra awe Dia di Himno y Bandera,” el a bisa .

E monarca a recorda momentonan historico clave pa Aruba, incluyendo 50 aña desde introduccion di Aruba su propio bandera y himno, y 40 aña di Status Aparte. El a describi e pais como un nacion orguyoso cu tin un posicion unico dentro di Reino Hulandes. “Aruba ta un pais orguyoso y autonomo dentro di Reino. Awe nos ta celebra nos amistad y nos conexion den libertad,” el a bisa.

Segun Su Mahestad, e relacion entre Aruba y Reino no ta limita na structura legal, sino ta basa riba un conexion profundo y comparti. El a pone enfasis riba e balor di e perspectiva Caribense dentro di e Reino.

“Bo input ta amplia nos mundo di experiencia comparti y ta fortalece nos posicion riba e escenario mundial,” el a declara .

Den su discurso, Su Mahestad Rey Willem-Alexander a dedica atencion considerable na e transformacion cu Aruba a pasa door di e añanan. El a señala cu desde e obtencion di Status Aparte, e poblacion a crece significativamente y e economia a cambia completamente di industria di petroleo pa turismo como motor principal .

El a elogia e reputacion di Aruba como un destino habri y hospitalario, describiendo e isla como un lugar unda hende ta sinti nan mes na cas. E concepto di seguridad y pertenencia, segun e Su Mahestad, ta fundamental pa tur comunidad. “Nos tur kier sinti nos mes comodo y sigur den nos mesun ambiente,” el a bisa .

Sinembargo, e discurso no tabata solamente festivo. Su Mahestad a tuma un posicion realista, reconociendo cu Aruba, mescos otro paisnan, ta enfrenta varios reto structural. Un di e puntonan principal, cu Su Mahestad a remarca, tabata e impacto di migracion riba e sociedad. El a menciona cu cambio den composicion di poblacion ta crea presion riba servicionan publico y cohesion social.

Turismo, aunke esencial pa economia, tambe a ser menciona como un factor cu ta crea preocupacion. Su Mahestad a trece dilanti e pregunta con Aruba por mantene su caracter unico y su medio ambiente natural mientras e industria ta sigui crece .

Ademas, el a referi na instabilidad geopolitico den region, particularmente e situacion na Venezuela, cual ta solamente a algun kilometer di distancia di Aruba. “Solamente un poco menos cu 30 kilometer for di aki. Nos mester enfrenta e realidad ey tambe,” el a bisa .

A pesar di e retonan, e Su Mahestad a subraya cu Aruba no ta su so den e mundo incierto actual. El a enfatisa e fortalesa di e lazo dentro di Reino Hulandes y e importancia di solidaridad.

“Aruba no ta para su so den un mundo insigur… nos solidaridad ta solido,” el a declara .

E discurso a conclui cu un nota personal, unda e Su Mahestad a expresa su aprecio pa e caracter di pueblo Arubiano, describiendo e isla como un simbolo di calor humano, alegria di bida y perseverancia. “Aruba ta calor, alegria di bida, y perseverancia,” el a bisa, deseando e pueblo un feliz celebracion .

Prome cu e acto protocolario a tuma lugar lidernan di fraccion den Parlamento a haya oportunidad pa reuni cu Su Mahestad, y cu Secretario di Estado Eric van der Burg.

Lider di fraccion MEP, Evelyn Wever-Croes, a indica cu p’e tabata esencial pa entrega un mensahe cla di autonomia y capacidad. “Pa mi tabata importante cu Su Mahestad a haya e mensahe cu nos mes por,” el a bisa. “Den 40 aña di Status Aparte nos a demostra cu, aunke tin hopi reto, nos por supera nan y nos a logra esey.”

Wever-Croes a enfatisa cu e progreso financiero di Aruba ta un prueba importante di e maneho responsable cu a ser implementa door di diferente gobiernonan. El a menciona specificamente e meta di debe riba GDP di 47%, cual ta bou di e norma di 50%.

“Esey ta danki na continuidad den maneho, den vision. Nos mester realisa cu Aruba ta avansa riba su propio forsa,” el a bisa.

Tambe el a subraya cu supervision ta un elemento cu e pais no kier perde. “Nos tin supervision, nos kier keda cu supervision, nos no kier pa esey cambia,” el a afirma, señalando cu esey tabata parti di e mensahe cu el a comparti durante e encuentro.

Di su banda, lider di fraccion PPA, Eduard Pieters, a describi e reunion como corto pero significativo, subrayando importancia di e relacion cu Reino Hulandes. “Tabata un momento cortico pero ameno. Nos a pone enfasis riba importancia di Reino Hulandes y e confiansa cu mester existi aden di e Reino,” Pieters a remarca.

Pieters a indica tambe cu e dialogo cu Secretario di Estado Eric van der Burg tambe tabata uno di hopi importancia. “Nos a splica cu Aruba ta bayendo bon financieramente, y e mes a reconoce esey, Nos ta pasando tur expectativa y aworaki mester sigui mantene e rumbo,” el a bisa.

El a reafirma posicion di PPA tocante legislacion di Reino, indicando cu partido no ta mira necesidad pa un Rijkswet. “Nos a demostra cu sin un Rijkswet nos por pone nos cosnan na ordo y sigui hiba e pais pa dilanti,” el a bisa.

Lider di fraccion AVP, Jennifer Arends-Reyes, tambe a expresa satisfaccion cu e encuentro, describiendo como positivo y encurashador. “E encuentro tabata hopi positivo y Su Mahestad tabata contento di ta na Aruba pa e momento aki,” el a bisa.

Segun Arends-Reyes, Su Mahestad Rey a reconoce e retonan cu Aruba ta enfrenta, pero a mustra optimismo tocante e progreso di e pais, specialmente den area financiero. “E ta hopi contento cu e desaroyonan cu e ta wak na Aruba. Esaki ta algo hopi positivo pa nos pais,” el a bisa.

El a agrega cu e reunion cu Secretario di Estado van der Burg a confirma e mesun impresion. “E ta hopi optimista riba Aruba y ta mira cu nos ta riba un hopi bon caminda pa e siguiente pasonan,” parlamentario Arends-Reyes a indica.

E bishita di Su Mahestad Rey Willem-Alexander no solamente a sirbi como un momento di celebracion nacional, sino tambe como un espacio pa reflexion y dialogo entre liderazgo di Reino y Aruba.