Director di ATA: entre esnan no-residente cu COVID-19 tin studiante biba na Hulanda

E cantidad di persona no residente cu COVID-19 na Aruba ta mas cu e casonan entre e residentenan. A pesar cu ayera tabatin mas caso positivo entre residente compara cu no residente, e total di personanan di Aruba mes cu COVID-19 ta 42, compara cu 55 cu no ta biba na Aruba.

A puntra Director di Aruba Tourism Authority y miembro di e Crisis Team Ronella Croes si esaki no ta ora pa cuminza exigi prueba di vacuna pa turista. Canada por ehempel a caba di habri su fronteranan y ta exigi prueba di vacuna pa esnan cu kier bishita e pais.

Segun Croes, desde re-apertura di frontera e casonan positivo na Aruba entre e no-residente a keda relativamente abao! “

Mester corda cu aunke cu mitar di e casonan activo actual ta califica como no-residente, esaki ta inclui turista, pero tambe studiante local por ehempel cu ta aki di biahe for di Hulanda.”

E Director di ATA a mustra cu mester realisa cu segun turismo ta crece, e casonan positivo bao di turista tambe por ta crece. “Pero mester keda pone esaki den contexto! Awe tin 55 caso bao di no-residente, di esaki tin studiantenan local tambe aden. Pero si tuma e 55 casonan riba un total di 100 mil turista cu ta spera e luna aki, e ta hopi abao ainda”

Otro parametro esencial cu mester tene cuenta cune ta e capacidad di cama na hospital. Te asina leu cu e miembro di Crisis Team sa, e cantidad ta bao control.

“Tur esaki no kiermen cu no lo introduci medida, no! Ya caba a introduci cambio na maneho di entrada como medida di precaucion, manera a informa siman pasa y manera aclaria recien. Ta sigui monitor y sigui ahusta maneho si y/of ora mester,” tabata e declaracion di Director di ATA Ronella Croes.

LEAVE A REPLY

Please enter your comment!
Please enter your name here