En conexion cu Dia Mundial di Asistencia Humanitario (World Humanitarian Day), e mision di e Organisacion Internacional di Migracion (IOM) na Aruba a tene un charla diamars nochi pa comunidad cera conoci cu nan trabao. Ademas a comparti un poco tocante e iniciativanan cu e mision tin andando actualmente riba nos isla. Duna pa representante di IOM, Sra. Alena Bisslik, e charla a elabora riba varios punto clave di e mision, incluyendo kico e ta enfoca riba dje, e servicionan cu nan ta ofrece y principionan di e organisacion. Tambe a resalta e metanan cu e mision tin pa futuro.

IOM ta un agencia cu ta cay bao di e sistema di Organisacion di Nacionnan Uni (UN) y ta enfoca riba trabao humanitario pa refugiado y migrantenan na mundo. E agencia a ser estableci na aña 1951 y ta sostene migrantenan rond mundo, desaroyando respuestanan efectivo na e dinamico di migracion y ta un fuente importante pa conseho riba politica y practica den e sector di migracion. E organisacion ta traha den situacionnan di vulnerabilidad, yudando esnan cu ta moviendo y tin mas necesidad pa guia y sosten. E organisacion tambe ta funciona como un capacidad dentro di gobiernonan rond mundo pa maneha tur forma y impacto di migracion.

Na 2018, gobierno di Aruba a invita IOM pa establece un mision riba e isla despues cu e crisis na Venezuela a surgi. Gobierno di Aruba e tempo ey a acorda na e establecimento di un mision riba nos isla pa atende cu e necesidadnan di e refugiado y migrantenan cu tabata drentando.

E mision na Aruba ta traha ambos cu gobierno y cu otro tipo di organisacion humanitario y instancianan gubernamental pa por garantisa cu e trayecto migratorio por ta uno sigur y na ordo. E mision ta enfoca riba varios area, incluyendo educacion, alimentacion, salud y proteccion di mucha.

Pa loke ta educacion, Sra. Bisslik a splica cu nan sa traha hunto cu studiantenan migrante como tambe scol y maestronan den forma di charlanan pa garantisa cu e studiante por integra sanamente na e sistema y cultura escolar na Aruba. Bisslik a menciona cu entre otro nan ta duna conseho na maestronan den e tereno di bullying—algo cu studiantenan migrante sa enfrenta. A splica cu hopi studiante cu ta haya nan mes den un cultura escolar nobo ta experencia dificultad pa compronde e idioma of cera amistad cu e otro studiantenan local. Tambe e mision ta yuda muchanan migrante haya e oportunidad pa cumpli cu nan educacion, di e manera aki cumpliendo cu e ‘leerplicht’, cual ta bisa cu ta obligatorio pa muchanan te cierto edad haya un educacion.

Den e tereno di alimentacion, esaki ta encera trabaonan cu ta cay principalmente bao Cruz Cora. Sinembargo, Sra. Bisslik a comparti cu IOM sa traha conhuntamente cu e organisacion aki te unda cu nan por pa asina brinda alimentacion na refugiado y migrantenan riba nos isla.

E mision tambe ta traha cu profesional y instancianan di salud pa por brinda consulta medico gratis na refugiado of migrantenan den necesidad. E mision a habri e prome clinica gratis pa consulta medico riba e isla, y Sra. Bisslik a splica cu riba diamars y diahuebs nan oficina na Dakota ta habri pa e consultanan aki. E mision tambe a establece e prome centro gratis pa cuido di mucha pa mayornan migrante na Aruba.

Segun e representante ta splica, servicionan di cuido medico na Aruba ta complica pa hende cu no tin AZV. Aruba su sistema di seguro nacional no ta cubri personanan cu no ta considera ciudadano y pues ta mira frecuentemente cu migrantenan no sa busca ayudo medico pa via di e gastonan enorme pa consulta, testnan y medicamento. Pa cu esaki, IOM ta ofrece ayudo den forma di referencia na diferente instancia y conseho. E mision ta ofrece nan clientenan voucher cu nan por hiba na un instancia di cuido medico. IOM ta tuma contacto cu e instancia aki pa splica e situacion di e persona den necesidad y ta haci e pago necesario pa asina e cliente por haya su servicio. Bisslik a splica cu e mision no sa duna nan clientenan placa directamente, como cu a mira den pasado cu tin biaha e placa aki no ta ser usa pa loke e tabata aloca p’e. E representante a splica cu pasobra refugiado of migrantenan sa enfrenta hopi gasto, por pasa cu nan por usa e placa ricibi pa otro gastonan kisas mas emergente, manera huur of pa cuida nan yiunan en bes di asistencia medico.

E mision tin un iniciativa di proteccion y integracion, unda ta ofrece apoyo di salud mental pa e migrantenan. Bisslik a splica cu hopi biaha migrantenan, specialmente adultonan mayor, ta keda den isolacion pa via cu nan ta den un ambiente desconoci. Como resultado, esaki por afecta nan salud mental. Pa yuda cu esaki e mision sa organisa sesionnan den grupo unda personanan por conta un poco di nan storia of cualkier frustracion of preocupacion cu nan por tin. E mision tambe sa organisa reunionnan pa e migrantenan por socialisa cu otro y di e manera aki busca sosten entre otro.

E mision tambe ta enfoca riba esfuersonan anti-traficacion. Manera Sra. Bisslik a informa, hopi refugiado y migrante ta cay victima pa traficacion humano. Pa combati esaki, e mision ta trahando hunto cu Coördinatiecentrum Mensenhandel Mensensmokkel Aruba (CMMA) dunando entrenamento na nan cliente pa por reconoce y preveni traficacion. Tambe e mision ta ofrece asistencia directo na victimanan.

E mision ta duna informacion y conseho na e migrantenan tocante con e sistema na Aruba ta traha, specialmente pa vivienda, documentacion, impuesto y otro instancianan gubernamental. Pa loke ta e tereno laboral, e mision na Aruba no ta ofrece ayudo directo pa haya trabao, pero si ta duna conseho tocante e sistema laboral, ley di labor, como tambe con pa prepara pa un trabao, les di Papiamento of Hulandes pa asina e migrantenan por integra nan mes den e forsa laboral di Aruba.

Aunke e mision por duna conseho of haci referencianan pa yega na documentacion, e mision no ta regla esaki of tin e poder pa preveni deportacion. A splica cu esaki ta un trabao cu no ta cay bao responsabilidad ni hurisdiccion di IOM. E mision di Aruba, manera tur mision di IOM rond mundo, ta opera den cuadra cu leynan di e pais unda nan ta situa. Manera a menciona, IOM ta un organisacion humanitario y aunke si tin algun inmunisacion pa atende cu migrantenan indocumenta—por ehempel pa yuda migrantenan indocumenta—e organisacion no ta surpasa mandato di e gobierno. Na mesun momento, Inmigracion di Aruba no por acerca e organisacion pa informacion tocante e migrantenan cu no tin status legal. Esaki ta relaciona na e ley internacional di privacidad stipula den e tratadonan internacional di UN den tereno di ayudo humanitario. Pa migrantenan cu ta desea di bay back nan pais di origen, a splica cu e mision tambe ta ofrece asistencia pa nan por ta riba e trayecto corecto pa logra esaki.

IOM, manera otro organisacion humanitario rond mundo ta enfrentando actualmente e situacion dificil di recorte den financiamento, causa principalmente pa e administracion nobo di presidente Mericano Donald Trump. Recien Bon Dia Aruba a publica cu operacionnan di UNHCR, e agencia di UN pa refugiado, lo stop na Aruba. Otro organisacion manera Pan-American Development Foundation (PADF) tambe ta enfrentando e mesun reto, y pa november ta mirando un posibilidad di cera nan portanan tambe. UNHCR a bisa cu tin 24.863 Colombiano y Venezolano, incluyendo refugiado y solicitante di asilo na Aruba y Corsou, pues e necesidad pa duna asistencia ta keda halto.

Pa yuda atende cu esaki, Sra. Bisslik a splica cu e futuro di mision lo encera un ampliacion den asistencia, manera Sra. Bisslik a conta. Esaki lo inclui un expansion den servicionan di proteccion, engrandecemento di integracion y creacion di mas oportunidad di colaboracion cu otro instancianan local y internacional riba e isla. Sinembargo, e cuestion di financiamento por keda un reto duradero.