E famoso dicho di ex Prome Minister señor Nelson Oduber cu ta bisa: Un cos ta campaña y otro ta goberna no a cay di laira. Esaki ta basa ariba e modus operandi di MEP y tambe AVP. Cada biaha ta campaña cu promesanan falso y sin sentido, pero cu pueblo ta kere aden y asina ta vota pa nan. Asina cada cuater aña ta pretende di ta bay habri e refineria y sanea nos debe nacional. Tanto MEP como AVP ta campaña cu apertura di e refineria aki cada cuater aña. Esaki te cu eleccion 2021, pero esaki nunca a bira un realidad.

Gobierno di MEP/RAIZ a sinta y RAIZ a hay’e confronta cu un contract cu LNG cu ni pueblo ni Parlamento no por a haya pa wak pero cu por arte de magia a evapora. Prome Minister a declara ayera 17 di januari cu pueblo mester acepta cu e refineria ta pa pasado.

E berdad ta cu pueblo mester bay acepta mucho mas cu esey. Pueblo mester acepta cu pueblo mes a participa na stroba Aruba su progreso door di cada biaha cay den trampa y mentira di MEP y AVP. Pueblo mester acepta cu e dos partidonan aki a haya suficiente oportunidad pa haci un diferencia positivo den e bienestar di nos pais pero cu nan a fracasa cada biaha di nobo. Tambe ta importante pa pueblo pone bon atencion y acepta cu ReD tin razon.

Desde 2013 ReD a declara cu no tin futuro mas pa e refineria y cu gobierno mester ta visionario pa por crea otro pilar economico pa nos pais. For di e tempo ey caba mi a papia di entre otro legalisacion di cannabis en general pa reenforsa turismo y crea un pilar economico nobo banda di Turismo. Nos a mustra con cu cannabis nos por genera mey biyon florin anual pa caha di gobierno. Cu e placa aki e ta bira mas facil pa realisa proyectonan na beneficio di nos a y comunidad.

Na 2017 ora a forma coalicion cu MEP y POR legalisacion di cannabis medicinal a bay den e acuerdo di gobernacion. Minister Xiomara Maduro a declara den Parlamento durante tratamento di presupuesto 2018 cu e industria aki ta bay genera e suma menciona pa caha di gobierno y e la describie como e di dos pilar economico di nos pais. Tur hende cu ta pone atencion awe sa cu tur cos tabata un show pa MEP/POR.

Banda di esaki ReD a mustra cu nos mester produci nos energia for di nos solo, biento y lama. Nos no a lag’e te aki y asina nos a presenta e vision cu Aruba mester planta y produci alomenos un parti considerabel di locual nos ta consumi aki na Aruba pa por baha importacion, baha prijs, genera trabou y draai un economia interno cu ta depende riba nos mesun hendenan.

Gobierno cada biaha ta organisa encuentro na San Nicolas cu San Nicolas Bussiness Association caminda un cantidad di comerciante ta participa cu nan ideanan con pa yuda Aruba su economia pa medio di diferente industria nobo na San Nicolas. Normal ta parce cu ta e hecho cu ta solamente na esaki tur cos ta keda. Nada ta concretisa cu excepcion di e hotel cu a bin cu tanto incertidumbre rond di dje y cu awe ta pone negoshi di yiu di tera core peliger na Baby Beach paso gobierno a haci promesa na desaroyador di e hotel. Despues cu pa varios aña ta busca un solucion na 2019, SBA a haya un presentacion den relacion cu cultivo di cannabis. Nan a dicidi mesora cu esaki nan kier mira. Gobierno na su turno a pretende cu pueblo cu e tambe a wak cannabis como un solucion pa nos problema di likides y awe nos tur sa cu nada a sosode y gobierno a tira culpa ariba situación cu banconan etc. Prome Minister a caba di declara cu pa 2023 e no ta kere cu legalisacion di cannabis medicinal lo tuma lugar tampoco.

Na 2017 nos a presenta e vision cu Sector Primario por yuda nos pilar economico tambe pa medio di tecnologianan nobo cu ta haci posibel pa cultiva un variedad mas grandi di berdura y fruta na Aruba pero tambe cu tecnologia cu ta maneha e costo di awa y energia cu ta bay tin mester pa reduci gasto di cultivo y asina hisa e ganashi di e cosecha produciendo un calidad halto di berdura cu fruta pa nos mercado y mercado internacional. Pueblo a vota y nos a termina den ministerio di Educacion.

MEP tabatin entre otro Sector Primario pa cuater aña. Cu pandemia cu no tabatin niun vision y te awe nada a sosode den e Sector aki ni despues cu e la wordo poni den e famoso fast track tampoco.

Awe na Januari 2023 M.P. E. Wever-Croes ta declara cu gobierno ta sostene desaroyo pa cu e industria di galiña na San Nicolas y cu refineria ta pa pasado.