Ayera na mainta, Vocero di departamento Bureau City Inspector, Robby Rosel a ofrece un conferencia di prensa pa splica comunidad tocante un situacion di sushedad na Sero Tijshi y el a duna algun recomendacion pa comunidad por transporta desperdicio riba caminda publico.
Rosel a comenta cu siman pasa nan a haya un yamada di un persona for di Sero Tijshi pa duna di conoce cu na un caminda tabatin un cantidad grandi di sushi tira. Ora Bureau City Inspector a yega te e sitio nan a haya e desperdicio en cuestion. Rosel a declara cu esaki tabata pertenece pa un parti di comercio.
Di mesun manera, el a bisa cu BCI a cuminsa cu un investigacion pa por conoce di unda e sushedad tabata bin y nan a haya algun articulo, manera carchi di hotel cu tabata pertenece na ‘Casa del Mar’. Ora BCI a puntra pa e persona encarga di e luga ey, e persona a acepta cu e articulonan si ta pertenece na nan, pero no por para responsabel pa esey, mirando cu nan tin un compania cu ta haci limpiesa pa nan y ta posibel cu e compania ta esun cu por tira tur e sushedad na Sero Tijshi.
Pero despues, e mesun persona a confirma cu e mes a tira tur e sushi ey y tempo despues el a haci e luga limpi.
Di otro banda, Rosel a señala cu aworaki ta e temporada cu e hende lo cuminsa haci cas limpi y tira tur tipo di sushedad afo. Tocante esaki el a sigura cu ta existi un cantidad grandi di autonan, pickup, trucknan cu ta transporta sushi, tera, mata, sin tapa debidamente. Den landsverordening, Articulo 17b ta indica cu ta prohibi pa transporta puin, afbraak, kalk, klei, mest, zaagsel, krullen, zand, spaanders, los stro, pakhooi, pakpapier, as, slijk, sushi of cualkier otro obheto of stof sin cu ta tapa debidamente den un medio di transporte, pa evita cu e desperdicio cay of bula afo.
Esaki ta nifica cu si un persona ta transporta desperdicio, mester tin un lona pa tapa e baki di e pickup of trailer completo cu nada por sali afo of bula. Esunnan cu no lo cumpli cu esaki por haya un boet y por bira un acto castigabel.
