Robert Anjie (Curpa): ‘Citgo Aruba e fracaso politico mas grandi den historia di Aruba’

ORANJESTAD –  Desde comienso esta april 2016 partido Curpa tawata e unico partido politico cu a vocifera di ta contra e deal cu PDVSA pa bin entre otro  cu Citgo na Aruba y a adverti gobierno y parlamento pa no cera e Citgo deal y si haci esaki e lo bay ta e fracaso mas grandi den historia di Aruba  y lo bay ta desastroso. Ta parce cu partido Curpa tawata tin rason.

Tur e partidonan politico e tempo ey a hunga politica barata pa haya voto door di   yena hende nan wowonan cu e Citgo deal lo trece trabou pa Arubianonan, placa den caha di gobierno y cu esaki lo stimula e economia.

Tur esakinan tawata y ta un mentira. Te hasta ta asina cu   MEP y AVP a bringa cu otro pa e elogio di a trece Citgo na Aruba. Nos tur por a wak, scucha y lesa esaki na television, radio y corant. Te hasta MEP a bisa varios biaha, te hasta diabierna ultimo,  cu si ta 1% di chens tin pa un reapertura di e refineria lo haci todo por todo pa logra esaki. Te hasta asina leu cu nan ta dispuesto di cera un deal cu e diabel pa logra e reapertura di e refineria un expresion cu a yega di wordo uza caba den pasado pa logra status aparte. Un expresion asina ta peligroso y tardi of tempran ta trece maldicion cu ne. Partido Curpa di otro banda a bisa cu un pais drechi cu politiconan drechi hamas  ta negocia cu un dictador di un pais cu ta maltrata y mata su pueblo y si haci esaki e lo trece un maldicion pa Aruba.

Pero e politiconan malvado no a worry cu esaki y door di aproba e Citgo deal a demostra cu nan ta mes malvado cu Maduro pasobra Maduro a hinca nan den un teatro y nan a actua mee cu ne . Mas cla e no por tabata ora cu nos a mira e firmamento mediocre  na television con e politico Arubano representando parlamento y Aruba no tabatin mag di bisa nada y ta solamente Maduro a pronkia cu un bari sin bom. Parlamento a vota voor pa e deal diabolico pa citgo bin Aruba anto sin lesa e contract djis pa hunga un politica barata hungando asina cu e sentimento y pan di hende y crea un ilusion falso.

Awe nos ta na unda nos ta cu Citgo Aruba pa motibo di un gobierno y parlamento incapacita  cu hamas por tin e bienestar di e pueblo na pecho. Partidonan politico cu a vota pa trece Citgo Aruba pa motibonan personal y politico creando asina un desaster pa Aruba mester disparce for di mapa politico pa semper pasobra esaki ta un blunder di marca mayor y un traicion grandi contra e pueblo. Partido Curpa desde di 2009 como unico partido a hinca den su programa pa desmantela Valero y desaroya e area aki grandimente y nos a hinca esaki e tempo ey den un plan grandi cu si esaki a wordo realisa awe San Nicolas y Aruba lo a florece.

Tambe den  ultimo lesion nos a presenta un plan gigantesco cu yama San Nicolas and beyond cu lo a crea un di tercer y cuater pilar economico. E pueblo mester realisa cu eleccion tin consecuencianan y si no vota bon esakinan tin consecuencianan severo pa e pais pasobra na final di dia si sembra bo voto den un gobierno malvado y corupto Dios sigur lo no ta cu un gobierno asina y lo bo no por spera un bon cosecha. For di un mal palo bo no por spera bon frutanan.

Si e gobierno tin e bienestar di Aruba na pecho e miho cos cu nan por haci ta pa retira, instala un zaken kabinet cu sa unda nan cara ta para y yama eleccion nobo pasobra mas nan keda sinta ta pio cosnan lo bira pa Aruba y e pueblo.  E Citgo deal cu ta e fracaso mas grandi den historia di Aruba mester tin consecuencianan politico pa e partidonan cu tawata voor pa trece Citgo Aruba.

 

 

You May Also Like

Andin Bikker: “Ami no ta kere cu Alonso Tromp tin un caso”

Cuminsamento di siman Camara di Comercio a manda un carta pa Alonso Tromp caminda ...

Parlamentario Marlon Sneek(AVP): ‘Inflacion riba cuminda a aumenta cu 4.1% y fruta 18.1%’

ORANJESTAD – Aruba tin un partido politico cu a cambia nomber den ultimo simannan ...

MEP: ‘E prome reto cu Gabinete wever-croes a hereda ta e reto financiero’

Prome minister di pais Aruba, Evelyn Wever-Croes, den su prome discurso den reunion publico ...