Robert Anjie (CURPA): ‘Pa falta di vision, creatividad y ideanan gobierno ta sigui copia programa di partido curpa’

ORANJESTAD – For di basta tempo caba partido CURPA ta nota cu gobierno y varios otro partidonan ta copia ideanan di e programa di partido CURPA y ta haci comosifuera ta nan ta e autor  di e ideanan mientras nunca nan a core campaña cu esaki. partido CURPA lo bay presenta un lista di e ideanan cu a wordo copia door di otro partidonan politico desde di 2009 manera entre otro meter di coriente  prepago, ley di defensa propio, ferry y mucho mas.

Algun dia pasa nos a nota otro copiamento di e programa di partido CURPA door di e minister di transporte na unda e ta pretende cu ta nan idea di manda barconan crucero pa San Nicolas y bin cu un waf di container na San Nicolas. Ambos ideanan tawata den e programa di partido CURPA desde 2009 y den ultimo eleccion nos a bolbe pone esaki den nos plan  pa San Nicolas cu yama “San Nicolas and beyond.” Nos tin esaki documenta preto ariba blanco, den articulonan manda pa prensa skirbi, menciona den conferencia di prensa, facebook y dos forum na unda nos a participa na 2009 organisa pa San Nicolas business association y Aruba ports Authority. Ora gobierno no tin vision, creatividad y ideanan propio nan ta copia di otronan anto haci comosifuera ta nan ideanan. Wel manda crucero y waf di container  pa San Nicolas no ta ideanan di gobierno of otro partidonan. Mi a bisa na varios ocasion cu copia no ta manera e original y mester ta cauteloso cu e copiamento pasobra nos programa ta di tal forma hinca den otro cu bo no por saca pida pida afo pasobra e exito di cada pida ta depende di otro cosnan menciona den e otro partinan di e programa.

Pakico boso no ta copia otro ideanan den nos programa manera saca nombramento y promocion di ambtenaar for di man di minister, baha e salarionan y beneficionan di politiconan, introduci term limit pa politiconan, nos maneho financiero y economico cu lo a stimula  e economia grandemente y baha e debe sin medida, nos maneho pa baha e edad di pensioen pa 60 y nos maneho estricto ariba tereno di inmigracion y anti corupcion? Gobierno y otro partidonan stop di horta y copia ideanan di otro y si bo no tin vision, creatividad y ideanan propio bay huma cannabis cu boso colega pa wak si e mente ta habri un poco mas pa bin cu ideanan aunke mi ta duda cu cannabis lo yuda pa habri boso mente.