Dianan pasa, comunidad a haya e tristo y polemico noticia di un mucha muhe di 12 aña cu a ser abusa sexualmente pa via di su tata, esaki a keda comproba despues cu Ministerio Publico a confisca e feto producto di e aborto y nan a mand’e pa Hulanda pa haci un investigacion forensico e cual a duna como resultado cu e feto a ser concebi via incest.

Tocante esaki, parlamentario di partido AVP, Robert Candelaria a manifesta cu ‘e caso aki ta algo horibel cu ta tumando luga den nos comunidad pero nos tur tin cu papia riba dje’.

El a manifesta cu pa e caso aki cu si e prueba cu tabata e feto no a sali dilanti el a keda cu palabra di e tata cu a viola y a saca su yiu na estado contra e palabra di su mesun yiu kende ta e victima.

Di mesun manera, el a comenta cu den ultimo dianan el a wordo acerca pa algun victima di casonan di abuso y segun el a bisa, ‘bo ta sinti e dolor cu ta biba den nos comunidad pa cu e topico aki pasobra e ta algo hopi cruel’. Tanto e parti di abuso sexual como e parti di violencia domestico ta algo cu tin cu tuma for di e comunidad pa motibo cu cada ser humano merece amor, respet pero e cuido y proteccion tambe y esey ta algo cu e victima di esaki no ta haya, segun Candelaria a expresa.

Tocante e sentencia di e tata, Candelaria a menciona cu esey a causa tambe hopi preocupacion den comunidad pa motibo cu e exigencia di straf tabata hopi abou cu tabata 4 aña y mei pa un tata cu a abusa di su yiu y sak’e na estado y despues e mester aborta su yiu.

Pa hopi biaha e hendenan ta bisa cu nan kier pa aumenta e castigo, Candelaria a bisa cu e no ta contra esey pero, e sa cu riba e caso aki e castigo maximo tabata pa 8 aña pero a pidi 4 aña y mey, hopi mas abou di loke e castigo maximo actual ta y esey ta loke e hues a duna.

Candelaria a comenta cu e ley penal tin como proposito ‘vergelding’ na prome luga, pa motibo cu e mester zorg pa tin husticia, si un persona a faya e mester sinti e consecuencia cu e mester para pe y paga pe, otro punto ta prevencion manera el a menciona pa ‘spanta’ e personanan pa no lo comete actonan asina pasobra esey ta trece consecuencia, tambe e mester tin un funcion di proteccion pa motibo cu e hende sa cu tin consecuencianan pa cu esey y comunidad mester biba y funciona den dje y por ultimo, si no ta existi un ley penal tur hende lo kier tuma e ley den nan propio man.

“P’esey ta existi un ley penal pa e ciudadano no tuma e ley den su man, esey ta un trabou di gobierno”, Candaleria a sigura. Ademas, el a señala cu a yega e tempo pa cuminsa discuti riba esaki, “mi ta kere cu ta necesario pa nos papia riba e totalidad di pedofilia y nos tin cu haci algo serio cune”, el a declara.

Asina mes, el a sigura cu e trayecto pa deal cu esaki mester ta mas cu un linea so, aumentando straf ta un pero tambe importante ta cu mester bin cu tratamento obligatorio pa e hendenan cu ta comete e tipo di fechoria aki, asina como tambe un tratamento pa e victima y su famianan pa con pa deal cu e dolor cu el a pasa aden, tambe pa yuda e persona pa rehabilita y resocialisa bek.

Candelaria a informa cu den Parlamento na e momentonan aki tin iniciativanan cu ta tumando luga y esey ta algo ‘positivo’ caminda cu departamentonan tin cu bay traha mas cerca cu otro, comparti informacion cu otro y tambe colabora mas pa asina no e departamento su prioridad ta prome pero e victima mester ta central, “e mester ta esun cu nos tin cu zorg pa traha hunto pa yuda e pa por haya husticia y tambe pa haya tratamento y ayudo cu tin mester” specialmente den caso aki cu e mucha muhe a pasa den dje.

Candelaria den su funcion a haci un apelacion pa tur hende y tur grupo cu kier papia riba esaki y bin den dje pa presenta sugerencia constructivo pa yuda yega na husticia real, tratamento pa victima y abusado y asina trece idea pa traha hunto.

Pa finalisa, el a trece dilanti cu tin un mancha asina grandi den comunidad den asunto di pedofilia y hunto ta bay traha pa resolve esey.