(Infobae) – Robot humanoide cu yama Atlas por haci trabao durante periodonan largo sin depende constantemente di intervencion humano.

Atlas por detecta ora e tin mester di energia, move autonomamente pa un stacion, cambia su bateria y despues bolbe na su puesto pa sigui cu su trabao.

Atlas, e robot humanoide desaroya pa Boston Dynamics, a incorpora un capacidad nobo cu por resulta importante pa su uso den fabricanan y almacen: awo e por cambia su propio bateria sin intervencion humano.

Ora e detecta cu su nivel di energia ta abao, e robot por move autonomamente pa un stacion prepara pa e procedemento, saca e bateria bashi, instala un bateria nobo y bolbe na su posicion pa continua cu su trabao.

E proceso completo ta dura menos cu tres minuut, un diferencia importante compara cu e aproximadamente 90 minuut cu Atlas tin mester pa carga un bateria completamente. Cu esaki, e compania kier reduci e tempo cu e robot ta keda para y facilita cu e por funciona durante turnonan mas largo.

Un bateria cu e robot por cambia sin asistencia

Autonomia di energia ta uno di e desafionan principal pa robotnan electrico diseña pa traha durante varios ora.

Atlas por funciona aproximadamente cuatro ora den condicionnan normal, aunke esaki por baha te alrededor di dos ora, ora e ta ehecuta tareanan particularmente exigente.

Te awo, un bateria bashi tabata significa un interupcion cu tabata rekeri intervencion humano of cu e robot mester warda pa bateria carga completamente. Cu e sistema nobo, Atlas mes por detecta ora tin mester di cambia bateria y move pa un stacion specifico.

Unabes e yega ey, e ta cambia e bateria y bolbe na e luga unda e tabata traha. Esaki ta permiti e robot bolbe na su tareanan den cuestion di minuut, en bes di keda para durante henter e proceso di carga.

E tecnologia ta specialmente dirigi na ambientenan industrial unda robotnan mester traha durante periodonan largo y unda reduci tempo sin produccion por tin un impacto directo riba productividad.

Un robot diseña pa traha den fabrica

Na april 2024, Boston Dynamics a retira e anterior version di Atlas, cu tabata funciona cu un sistema hidraulico. Poco despues, compania a presenta un generacion completamente electrico, desaroya desde principio pa aplicacionnan industrial.

E Atlas nobo ta midi alrededor di 1,9 meter di haltura y ta pisa aproximadamente 90 kilo. E ta diseña pa manipula diferente tipo di obheto y por transporta carga di te 30 kilo continuamente. Pa periodonan cortico, e por carga te 50 kilo.

Pa move y traha den espacionan industrial, Atlas tin camaranan cu ta dun’e vision di 360 grado, ademas di sensornan tactil den su mannan.

E sistemanan aki ta permiti e identifica obhetonan y reacciona na diferente situacionnan mientras e ta ehecuta su trabao.

Inteligencia artificial pa adapta na su ambiente

Otro caracteristica importante di Atlas ta su uso di inteligencia artificial y aprendisahe automatico.

En bes di simplemente ehecuta movementonan completamente predetermina, e robot ta diseña pa adapta na e condicionnan cu e ta enkontra durante su trabao.

E capacidad aki ta particularmente importante den fabricanan, unda obhetonan no semper ta den mesun posicion y condicionnan di e ambiente por cambia.

Meta di Boston Dynamics ta pa Atlas por ehecuta tareanan industrial cada biaha mas autonomamente, reduciendo necesidad pa un hende supervisa constantemente tur su movementonan.