Den pasado nos a toca varios bes e tema di Inteligencia Artificial (AI), automatisacion. Esaki tambe ta causa cu mester un ‘vangnet’ social mas amplio y innovativo, manera Universal Basic Income.

Den e articulo aki nos lo toca e parti mas visual di e tsunami binidero di automatisacion, esta Robotica. Den varios ehempel nos lo mustra cu e tecnologia ya caba ta sumamente impresionante y dicon esaki lo causa cambionan radical pa sociedad.

Dark Factories: Ni 1 hende necesario

Den un reportahe elabora di Wallstreet Journal (WSJ), a tuma nota di e fabricanan ultra-sofistica na China, cu ta wordo yama “Dark Factories”, esaki dor di e hecho cu dor cu no tin necesidad pa ningun hende ta parti di e proceso di produccion, ni luz riba e vloer di fabrica mester ser cendi.

Den caso di e rapport di WSJ, a nota cu e produccion di auto electrico na e fabrica ta tuma lugar 24/7 y 365 dia pa aña y cu un produccion di mas-o-menos 30 auto electrico pa ora. Na e banda positivo nos por nota cu innovacionnan asina lo baha prijs di produccion di auto electrico, cual lo beneficia consumidornan manera na Aruba eventualmente. Na otro banda e ta mustra con leu automatisacion lo por bay cu te hasta full un fabrica no tin necesidad pa ni 1 hende pa full un proceso di produccion, toch well di un producto sofistica manera un auto electrico.

Robot di Restaurant.

Un otro ehempel sumamente impresionante ta bin di Alemania den forma di e Robot CA-1. E robot en cuestion ta uno cu a automatisa casi full e proceso di cushinamento den un restaurant. E por produci den total 120 diferente plato di cuminda na calidad di un restaurant den menos cu 1 ora. Full e sistema aki di un restaurant robotico ta rekeri solamente 1 ora pa dia cu un hende mester atende e robot. Den experimentonan na Alemania, e sistema aki ta mustra cu e por reduci gastonan corela cu labor humano cu 95%. Esaki ta mustra cu robot sofistica no ta solamente pa procesonan ultra-high-tech, manera e prome ehempel, pero tambe pa cosnan mas mundano mane un restaurant. Na un banda positivo dor di e menos gasto di labor, e prijs di e cuminda cu e restaurant ta produci ta sumamente atractivo na 6 euro pa plato.

Obviamente na otro banda tur e labor cu no lo bay tin uso di dje mas ta un factor cu sociedad mester cuminsa pensa hopi di dje, dor cu esaki no ta labor studia pero di esnan di menos recurso, cu ya caba ta bou un presion inmenso economicamente.

Universal Basic Income

Cu e ehempelnan menciona kier mustra cu AI & Robotica no ta algo di un futuro hopi lew, pero uno bastante cercano. Tambe nos a mustra cu automatisacion ta toca no solamente trabounan ultra-high-tech, pero tambe por ehempel di sector hotelero. Tur esaki ta mustra e necesidad urgente pa nos como sociedad cuminsa pensa di ‘vangnetten’ nobo cu lo ta sumamente necesario.

Na un banda innovation tin e promeso di baha prijs pa casi tur producto, pero na otro banda hendenan cu wordo reemplasa mester haya un futuro digno y sigur. Esaki segun mi persona lo mester tuma forma di Universal Basic Income cu lo wordo funda dor di taxatie riba Kapitaal & AI. Tambe na un nota mas filosofico, nos como sociedad y vooral individual mester cuminsa pensa riba e thema di “zingeving”, den un scenario cu casi tur trabou wordo automatisa.

Eora e pregunta ta: Kico lo ta bo doel den bida si, den un mundo sin trabou humano?