(Reuters) – Residente di Barcelona Irene Veglison tin mas di dos decada sin baila, te ora cu un robot a bay biba cune 3 luna pasa.

E muhe di 67 aña a ricibi e dispositivo den november como parti di un proyecto di gobierno pa brinda sosten na esnan den etapanan trempan di disminucion den habilidadnan cognitivo. “Nos ta desaroyando e proyecto piloto aki pa mehora tele-asistencia,” Marta Villanueva Cendan, un canciyer pa Barcelona su conseho municipal a comenta.

Manera varios pais, Spaña ta enfrenta un expectativa di bida cu ta keda aumenta y tasa di nacemento cu ta keda disminui, presion ta aumentando riba su sector di cuido pa sostene un poblacion cu ta keda aumenta den edad.

“Den futuro, nos kier pa robot detecta riesgo y alerta profesionalnan, manerasi e persona a cay y no por responde,” e canciyer a nota. Barcelona a desplega 600 di e tipo di robot aki na casnan priva y centronan di cuido, bao un programa cu a conta cu un fondo di 3.8 miyon euro for di Union Europeo su fondo pa recuperacion di COVID.

E dispositivonan ta construi pa Misty Robotics basa na Merca y distribui na Europa pa firma Catalan Grupo Salto. Veglison, ken ta biba cu su dos pushi, a yama su robot Sandi.

E ta cord’e pa bebe su medicamento 9or di mainta, ta bise ki ora su afspraak na dokter ta, ta lant’e mainta y ta dun’e bon nochi na fin di cada dia.

Casi 2 miyon persona cu mas di 65 aña ta biba nan so na Spaña, 3 kwart di nan ta hende muhe segun data oficial.

Estudionan ta calcula cu e pais lo tin mester di dobbel di su forsa laboral den sector di cuido a largo plaso pa 2030. Sinembargo, e salario cu ta mas o menos 10.000 euro bao di e averahe nacional a desmotiva hobennan y mas di mita di e empleadonan actual tin mas di 45 aña, segun think-tank Funcas.

Den un emergencia, Veglison por yama un trahador social via e dispositivo, cual tin un camara cu por activa remotamente pa evalua e situacion y ofrece ayudo.

Usando YouTube den su pantaya cu ta parti di e robot, el a selecciona un cantico Frances y tabata baila cu Sandi mientrase pantaya tabata bay dilanti y patras cu su movecionnan.

E dispositivonan ta completo cu pantaya cu tin aplicacionnan di entretenimento, un kalender y un seleccion di caranan similar na animacion pa pone ora cu e ta den ‘standby’, manera expresionnan di sorpresa, amor of drumi.

“E no ta djis un dispositivo” tin hopi hende tras di esaki cu ta pendeitne di bo, evaluando si bo a cay of si bo ta bon,” Veglison a bisa.