ORANJESTAD – Manera ta conoci e comision fiho di Parlamento encarga cu asuntonan Hudicial a base regular ta reuni cu minister di Husticia Andin Bikker. Den cuadro di e ultimo desaroyonan, como presidente di e comision parlamentario Rocco Tjon MBA a convoca un reunion diamars venidero. Lo elabora riba diferente topico, pero muy specifico lo trata e ultimo desaroyonan di asilo y siguridad na nos fronteranan.
Desaroyonan actual
A base di Tratado pa asilo corte a dicidi cu 13 persona procedente di Venezuela cu a yega tera recientemente mester haya e asina yama “meldplicht”. Esaki ta ora cu e proceso di nan peticion pa asilo keda cla. Obviamente e desaroyo aki a causa consternacion den comunidad.
Medidanan di maneho
Mirando e desaroyo aki minister Bikker mesora a designa centro di Warda Nos Costa como luga caminda esunnan cu pidi asilo mester permanece obligatoriamente. Es decir esunnan cu pidi asilo no por cana liber pero mester permanece na e centro aki. Despues cu e proceso di nan peticion termina y resulta cu nan no tin derecho riba asilo nan lo wordo deporta.
Pa conclui
E diferente medidanan di maneho ta positivo y p’esey Parlamento kier reuni di forma urgente cu Minister. Ta importante pa sa di Minister si mester di mas fondo pa ehecuta e pasonan menciona. Na mes momento tambe ta importante pa wak y debati posibel consecuencianan legal y financiero y tambe delibera riba e pasonan necesario cu mester tuma pa nos siguridad interno y na nos fronteranan, sr. Tjon a termina.
