Dos aña pasa, cu miyones di hende sin trabao y banconan central y politiconan luchando pa lanta economia for di un recesion induci pa pandemia, inflacion tabata parce como algo pa despues. Un aña despues, cu reduccion di desempleo y e tasa di inflacion den aumento, hopi di e mesun legisladornan a insisti cu e aumentonan di prijs tabata ‘transitorio’ – consecuencia di disrupcion den cadenanan di suministro, escasez di labor y otro problemanan cu lo a resolve nan mes eventualmente.

Awo, cu e tasa di inflacion na Merca mas halto cu nunca desde inicio di añanan 80, oficialnan di administracion di presidente Joe Biden a reconoce cu nan a faya. Segun e rapport mas recien di Bureau di Estadistica Laboral, e tasa di inflacion anual na mei tabata 8.6 porciento, e nivel mas halto desde 1981, segun midi pa e Consumer Price Index. Otro medidanan di inflacion tambe a mustra aumentonan significante durante ultimo aña, aunke no na e mesun nivel cu e CPI.

Pero Merca no ta e unico lugar unda hende ta experimentando e ‘latigazo’ inflacionario. Un analisis di data di Pew Research Center di 44 economia avansa ta haya cu, den casi tur di nan, prijs di consumidor a aumenta substancialmente desde temponan pre-pandemia.

Den 37 di e 44 pais aki, e averahe di tasa di inflacion anual den e prome kwartaal di e aña aki tabata al menos dobel loke e tabata den e prome kwartaal di 2020, tempo cu Covid a cuminsa su expansion mortal. Na 16 pais, inflacion den prome kwartaal tabata mas cu cuatro biaha e nivel di dos aña prome. Pa e analisis aki, Pew Research Center a usa data di Organisacion pa Cooperacion y Desaroyo Economico (OECD), un grupo di paisnan altamente desaroya y democratico. E data ta cubri 37 di e 28 pais miembro di OECD, ademas di otro siete pais economicamente significante.

Entre e paisnan studia, Turkia tabatin e tasa di inflacion mas grandi den prome kwartaal di 2022: un alarmante 54.8 porciento. Turkia a experiencia inflacion halto durante añas, pero esaki a aumenta na fin di 2021 mientras gobierno a busca politicanan economico poco convencional, manera reduci tasa di interes na lugar di aumenta esakinan.

E pais unda inflacion a crece mas lihe durante ultimo dos aña ta Israel. E tasa di inflacion anual na Israel tabata bao di 2 porciento (y hopi biaha negativo) tur kwartaal desde comienso di 2012 te cu mita di 2021; den prome kwartaal di 2020 e tasa tabata 0.13 porciento. Pero despues di un recesion relativamente leve, e CPI di Israel a cuminsa aument arapidamente: E tabatin averahe di 3.36% den prome kwartaal di e aña aki, mas di 25 biaha e tasa di inflacion den e mesun periodo na 2020.

Sin importa e nivel absoluto di inflacion na cada pais, mayoria ta mustra variacion di e mesun patronchi basico: nivelnan relativamente abao prome cu pandemia di Covid-19 den prome kwartaal di 2020; tarifanan plat of reduciendo pa resto di e aña ey bayendo den 2021, mientras cantidad di gobierno a reduci actividad economico; y aumento di tasa cuminsando na mita te fin di 2021, mientras mundo a lucha pa bay back na algo parecido na normal.

Segun e ultimo cifranan di Bureau Central di Estadistica di Aruba (CBS), e promedio anual (ultimo 24 luna) di e tasa di inflacion pa e periodonan di Juni 2020 te cu Juni 2021 y Juni 2021 te cu Juni 2022 ta 3.4%, un subida di 5.2 ppt compara cu e -1.8% registra den e periodonan di Juni 2019 te cu Juni 2020 y Juni 2020 te cu Juni 2021. Durante e luna aki, shete (7) di e diesdos (12) sectornan a registra subida di prijs. Ademas, e CPIC (core inflation) – CPI excluyendo e efecto di energia y cuminda – a registra na Juni 2022 un subida
di 2.0%. E indice di energia – cu ta consisti di e productonan: electricidad, awa, gasolin y diesel a registra
un subida di 9.0%. E indice di cuminda a registra un subida di 5.1%.

Pero tin excepcion na e patronchi di caida y subida aki. Por ehemplo na Rusia, tasa di inflacion a aumenta di forma stabiel durante periodo di epandemia prome cu aumenta na inicio di su invasion di Ucrania. Na Indonesia, inflacion a cay trempan den e pandemia y a keda na nivelnan abao. Hapon a continua su lucha di añas contra tasanan di inflacion cu ta demasiado abao. Y na Saudi Arabia, e patronchi tabata robes: e tasa di inflacion a aumenta durante e pandemia pero a cay hopi na fin di 2021; el a aumenta un tiki desde esey, pero ta apenas 1.6 porciento.

Pero ta parce cu inflacion no a caba cu mundo desaroya ainda. Un rapport interino di OECD a haya cu e tasa di inflacion na april a bay dilanti di e cifra di maart den 32 di e 28 pais miembro di e grupo.

Segun Banco Central Europeo inflacion ta sucede ora tin aumento amplio den prijs pa bienes y servicio, no solamente di articulonan individual; e ta nifica cu bo por cumpra menos cu un florin awe cu loke bo por a cumpra ayera. Den otro palabra, inflacion ta reduci e balor di placa durante tempo.