A selecta e ciudad Hulandes di Rotterdam como anfitrion pa e festival di cantica, Eurovision otro aña, despues di vence Maastricht pa e posicion.

Hulanda lo ta anfitrion di e show pasobra e cantautor Duncan Lawrence a gana e concurso aña pasa – e prome victoria Hulandes den 44 aña. E concurso lo tuma luga den e compleho di exhibicion Ahoy, cual ta sede di feria comercial, partido di tennis, y e North Sea Jazz Festival. E semi-final lo tuma luga diamars dia 12 di mei proximo y diahuebs dia 14 di mei, cu e gran final diasabra dia 16 di mei.

Rotterdam, Utrecht, Maastricht, Arnhem y Den Bosch tur a entrega ofertanan formal pa ta anfitrion di e show. Amsterdam a retira di e competencia despues cu alcalde Femke Halsema a bisa cu ningun sitio capaz di tene e evento tabata disponibel pa e periodo rekeri di ocho siman.

Pa tene e evento lo costa hasta 30 miyon euro, y conseho provincial di Zuid Holland a bisa cu lo contribui 1 miyon. Consejal di Rotterdam, Said Kasmi, a bisa cu e no sa ainda con grandi e suma ta cu e ciudad lo contribui cune, pero cu esaki lo ta considerabel.

 

 

LEAVE A REPLY

Please enter your comment!
Please enter your name here