(NLTimes) – E presentacion Nacional di Klapchi riba e Brug di Erasmus di Rotterdam lo no tuma luga e anochi di Aña Nobo aki despues cu e organisadonan no a logra recauda suficiente placa y e municipio a nenga di interveni, poniendo un fin na un di e tradicionnan di vakantie mas reconoci di e ciudad.
E cancelacion ta sigui un recorte di financiamento na comienso di e aña aki door di e Conseho di Municipio di Rotterdam. Despues organisadonan a lansa un campaña di crowdfunding pa recauda 1.2 miyon euro necesario pa tres show planea pero a colecta solamente 28.000 euro.
Organisado Klaas Rohde a bisa Rijnmond cu e cancelacion ta “increibel.” “Ainda mi ta haya straño cu e municipio ta scoge pa no haci show di klapchi; e ta inimaginabel,” el a bisa. “Mi ta purbando di tuma contacto cu e municipio ainda, aunke nan a indica caba cu nan lo no haci’e,” el a agrega. E fundacion tras di e evento a termina su esfuersonan pa recauda fondo diabierna.
Rohde a elogia e trabou di e fundacion pero a critica e falta di sosten di gobierno. “Nan a haci un trabou fantastico. Pero hendenan ta paga belasting caba, y ningun caminda na mundo tin shownan di klapchi cu no ta ser financia pa gobierno,” el a bisa. “Tampoco bo no tin careteranan financia pa companianan grandi.” Rohde a argumenta cu e responsabilidad pa organisa e show di klapchi ta keda na gobierno di municipio.
Rohde a adverti cu cancelacion di e programa oficial por conduci na intrankilidad na Rotterdam. “Di berdad mi ta kere cu nan ta tumando un riesgo irresponsabel. Hopi municipio ta lanta show di klapchi publico hustamente pa evita riesgonan,” el a bisa Rijnmond.
Cuminsando na 2026, un prohibicion nacional riba klapchi di consumidor lo drenta na vigor, haciendo e proximo Bispo di Aña Nobo 2024–2025 un di e ultimo oportunidadnan pa presentacionnan di klapchi priva.
