Diadomingo 22 di januari lo tuma luga e eleccion di Reina Grandi di Aruba su carnaval hunto cu e eleccion di Señora Carnaval. Adrienne Jacobs, un hoben di 25 aña di edad ta un di e participantenan pa reina grandi y ta representando Royal Carnival Group. Jacobs ta conta un tiki di con su preparacion pa e gran dia aki ta bayendo.
Jacobs a splica cu e preparacion ta bayendo tremendo. Como cu e tabata un decision cu e hunto cu su famia a tuma na december e tempo cu nan tin pa prepara ta hopi cortico, pero asina mes cu e tempo ta hopi cortico, el a indica, e preparacion ta bayendo hopi bon.
“Tur dia mi ta bezig ta train cu grupo di baile, cu mi coach personal y tambe mi tin un ekipo hopi fuerte mi tras caminda tur ora nan ta traha. E ekipo ta inclui e decorado, diseñador, mi coreografo, mi famia, e grupo di baile cu ta train tur dia pa haci un tremendo show e dia ey y hopi hende mas. Mi ta hopi gradicido na henter mi team”, Jacobs a bisa.
Personalmente, Jacobs a remarca, e ta hopi emociona y e no ta hopi nervioso pasobra e tin custumber caba di ta riba stage for di jong. El a agrega cu e ta hopi emociona pa ta riba stage back despues di 10 aña ora cu el a bay pa reina hubenil na aña 2013.
“Semper cu mi a subi escenario mi a bay cu e mentalidad di ‘have fun’. Djis disfruta, y gana of perde, tur e reinanan ta keda un reina riba nan mes,” el a enfatisa.
Por ultimo, Jacobs a manda su mensahe special pa e pueblo carnavalesco di Aruba. “Mi kier bisa pueblo carnavalesco di Aruba ban celebra Carnaval 69 di un manera sano y responsabel. Despues di dos aña cu no tabatin carnaval, ban celebra e aña aki na un manera trankil, gosa di e carnaval trankil y ban inspira nos hobennan pa engrandece nos carnaval, vooral e futuro generacion. Laga nos ta un ehempel pa esunnan cu ta na caminda. Asina ta gos’e, celebra en grande, pero responsablemente.”
