(AP)—Ruanda a gara atencion internacional—y tambe indignacion di algun hende—ora el a acepta pa ricibi buscadonan di asilo rechasa na Reino Uni den un plan cu a cay aña pasa. Awor Ruanda ta bisa cu e ta den dialogo cu e administracion di Trump riba un idea similar—y e por ta mas exitoso.
E negociacionnan ta representa un expansion den e esfuersonan Mericano pa deporta hende na paisnan cu no ta nan pais di origen. Merca ya a manda hende for di Venezuela y otro pais na Costa Rica, El Salvador y Panama, pero ainda no a anuncia un acuerdo grandi cu gobiernonan den Africa, Asia of Europa.
Ruanda ya pa hopi tempo a resalta den e continente Africano como un pais cu a logra recupera for di e genocidio di 1994 cu a mata mas cu 800.000 Tutsi y Hutu. Bao di su presidente di hopi aña, Paul Kagame, e ta promove su mes como un oasis di stabilidad. Pero organisacionnan di derecho humano ta sigura cu esey tin un prijs doloroso, citando represion mortal contra supuestamente oponentenan politico.
Ruanda a defende su posicion, bisando cu a pesar di ta un di e paisnan mas densamente pobla den Africa, e tin espacio pa yuda alivia un problema cu hopi pais den Europa—y tambe Merca—ta considera un crecemento: Migrantenan no desea.
Minister di Asunto Exterior di Ruanda a confirma dialuna na The Associated Press cu e pais ta den dialogo cu Merca tocante un posible acuerdo pa ricibi migrantenan deporta. El a bisa anteriormente na medionan estatal cu e discusionnan ta den “fase inicial.” Minister Olivier Nduhungirehe no a duna mas detaye, pero a bisa cu esaki ta conforme cu e compromiso largo di Ruanda pa busca solucionnan pa migracion.
E Departamento di Estado di Merca no a comenta riba e posible acuerdo, pero a bisa cu pa traha cu gobiernonan stranhero ta un parti importante di su politica pa disuadi migracion ilegal.
Reportahenan local na Ruanda a sugeri cu Merca lo probablemente financia un programa pa integra migrantenan den sociedad via salario y asistencia pa busca trabao.
E plan fracasa entre Ruanda y Reino Uni
Reino Uni a firma un acuerdo cu Ruanda na 2022 pa manda migrantenan cu yega na Reino Uni como polizon of den boto na e pais Africano, caminda nan peticion di asilo lo ser procesa y, si nan logra, nan lo keda biba ey.
E plan a para pa motibo legal y a ser critica fuertemente pa organisacionnan di derecho humano, cu a yam’e inetico pa manda migrantenan na un pais 6.400 km leu caminda cu nan no kier keda.
E plan a cay den otro aña pasa despues cu e gobierno Labour nobo a tuma poder. E minister di Asunto Interior nobo di Reino Uni a yama e plan “e malgasto mas escandaloso di placa di contribuyentenan cu mi a yega di mira” y a calcula cu e costo tabata 904 miyon dollar.
Ningun vuelo pa Ruanda a tuma luga den marco di e plan, pero e gobierno a bisa cu e costo total tabata inclui 387 miyon dollar cu a ser paga na Ruanda. Ruanda a bisa cu e no tabata obliga pa paga esey back.
Preocupacionnan tocante derecho humano
Defensornan di derecho humano a expresa nan preocupacion di e fayecimentonan di supuestamente criticonan di gobierno Ruandes den custodia, y tambe di e supuesto matansa di exilionan na lugarnan manera Sur Africa. Ruanda a responde tin biaha cu rechasonan rabioso na reportahenan di abuso di derecho humano—incluyendo e secuestro y detencion di un residente Mericano cu a ser engaña pa subi un avion pa Kigali mientras e tabata bishitando Dubai. El a ser libera despues di presion di e administracion di Biden.
Ruanda tambe ta haya critica pa su accionnan militar agresivo den e region. Expertonan di UN a documenta e sosten di Ruanda na un rebelion cu a tuma dos ciudad na e parti oriente di Congo, un area rico den mineral. E situacion a crea temor pa un guera regional nobo, y hopi pais di e mundo Occidental a corta relacion of a restringi yudansa na e pais. Ruanda a bisa cu e ta defendiendo e comunidad Tutsi den Congo.
E administracion di Trump, cual a sanciona un minister Ruandes y a referi na un enlace cu rebeldenan, ta purba yega na un acuerdo di paz. Pa acepta migrantenan deporta di Merca por mehora e posicion di Ruanda banda di Washington y otro paisnan.
Historia di Ruanda cu migrantenan
Ruanda na 2019 a firma un acuerdo cu e agencia di refugiado di UN pa yuda ricibi migrantenan saca for di Libia, caminda hopi hende cu a purba yega Europa a reporta abuso den centronan di detencion. Segun UN, e centro di transito na Ruanda tin capacidad pa 700. Na final di aña pasa, a ser reporta cu mas cu 2.400 hende a ser asisti den loke ta considera un estadia temporal durante e proceso pa haya “solucionnan a largo plaso” incluyendo relocacion pa un otro pais.
Prome cu e acuerdo cu Reino Uni a cay, Ruanda a gaba di un otro centro di transito, un hotel renoba na Kigali, cu por ricibi 100 persona, cu opcion pa amplia si ta necesario. Ruanda a bisa cu e lo procesa documentonan di migrantenan dentro di tres luna. Nan por keda of gobierno lo yuda esnan cu kier bolbe na nan pais. Ruanda a compromete pa cubri e gasto pa cinco aña.
No ta cla ainda si e mesun termino lo ta inclui den un posible acuerdo cu Merca.
