Ruman muhe S.D.S di 18 aña di e victima di asesinato na de Vuyst ta deteni. Esaki a base di sospecho di ladronicia.
Ministerio Publico no por a duna mas informacion si ta relaciona cu e caso di asesinato di su ruman muhe.
Cuerpo Policial a manda un informe pa prensa ayera cu e hoben ta deteni pa motibo di e caso yama Fist. Sinembargo Ministerio Publico (OM) no a confirma cu su detencion ta relata cu e asesinato di su ruman. OM ta contesta Bon Dia: “Tocante esey nos no ta duna comentario ni si of no.”
Esaki ta e di dos detencion den e caso aki. E prome sospechoso a wordo deteni a base di nombernan duna na autoridadnan. OM a informa un poco riba e procedura y e investigacion cu a conduci na e detencion siman pasa. Procurador General Alexander Van Dam a informa cu Instituto Forensico di Hulanda (NFI) a analisa e profiel di DNA di e prome sospechoso deteni. Ora cu a compara esaki cu DNA haya na sitio di e crimen a constata cu esaki tabata concorda cu otro.
Proceso
Manera nos a publica siman pasa, ora nan ta presenta un sospechoso dilanti un hues comisario esaki ta un di e stapnan primario pa asina determina si e investigacion cu persecucion publico, esta OM, ta hibando dilanti ta cuadra cu ley, si e ta bayendo na ordo y si ta necesario pa sigui.
E proceso cu ta canando actualmente ta un di e prome stapnan den e sistema di detencion cu ta vigente na Aruba. Pa awo e detencion a wordo prolonga pa 8 dia. Despues di esaki hues comisario lo determina si lo sigui e proceso di detencion. Ministerio Publico ta subraya cu ta percura pa procesonan di detencion wordo impone riba un persona solamente ora esaki ta necesario, mirando cu ta algo ‘hopi pisa’.
