Evanielle Rincones di 17 aña y Ry-Eza Rincones di 14 aña di edad a participa den e musical West Side Story bao direccion di Michelle Schmitz. Esaki ta un produccion cu nan scol, NSG Groenewoud, tin 3 aña trahando riba dje y aña pasa e rumannan a wordo acerca pa nan docentenan di musica, Gijs Verstegen y Ronald Pes, pa asina participa den e musical aki.
Pa sigura nan participacion den e musical, e hobennan mester a pasa den un proceso di audicion na unda nan a wordo evalua den e dicsiplinanan di canto, actuacion y baile. Tur dos hoben a pasa e audicion aki exitosamente y nan tabatin un aña di preparacion pa presenta e musical.
West Side Story ta un musical hopi conoci y ganador di diferente premio importante tanto den teatro musical como pa su varios adapctionnan den pelicula. E ta un musical original di Jerome Robbins inspira den e storia di amor di Romeo y Julieta.
Ambos hoben ta forma parti di e elenco na unda nan actua, baila y canta den e henter musical. E director musical y e director di baile, Ronald Pes y Nash Smith, a keda hopi contento cu e disciplina y talento di e rumannan, Evanielle y Ry-Eza.
Pa e hobennan esaki tabata un experiencia inolvidabel y nan ta hopi orguyoso di por a forma parti di e elenco di e gang ‘Sharks’ den e legendario musical aki.
E musical a wordo presenta dos biaha pa dia durante tres dia, 8, 9 y 10 di december 2022, na unda tur dia e sala tabata yen. Sin duda algun e musical aki, cu a keda presenta pa alumnonan di NSG Groenewoud, ta un produccion grandi y di un nivel halto. Un pabien grandi ta bay na e hobennan aki y un biaha mas nos Arubianonan ta luci y ta halsa bandera di Aruba den exterior!
