E anuncio di Ministerio di Exterior Hulandes, cu a cambia su conseho di biahe pa Venezuela na nivel cora, recomendando pa no biaha na e pais pa ningun motibo, a genera incertidumbre y curiosidad na Aruba. Esaki pasobra no a duna ningun motibo pakico precies na e momento ey a dicidi di haci e cambio. Kico tabata e suceso cu a ocasiona un cambio asina? Riba rednan social, algun persona ta pensa ta pa motibo cu na Venezuela ta secuestrando ciudadanonan Hulandes, cobrando rescate hopi caro.

Rumornan riba rednan social ta adverti pa ciudadanonan di Aruba no biaha pa Venezuela, indicando cu Arubianonan a keda secuestra, y cu ta cobra sumanan enorme di placa pa nan liberacion. Bon Dia Aruba no por a confirma un caso asina, pasobra probablemente e caso a keda resolvi di manera priva sin involucra autoridadnan oficial. Sinembargo, si tin algun caso confirma di ciudadanonan Hulandes cu a keda secuestra na Venezuela – y medionan di comunicacion regional tambe a adverti di e suceso.

Secuestro na man di estado

Medio Hulandes, Trouw, e aña aki a reporta e desaparicion di un ciudadano Hulandes despues di su aresto na Venezuela. E caso aki, di un homber di 32 aña di edad, di nacionalidad Hulandes, a desaparece na Venezuela despues cu el a keda aresta na aeropuerto di Caracas dia 24 di december 2024. El a biaha for di Lisbon pa bishita un amigo na Venezuela durante dianan di fiesta.

Ministerio di Exterior Hulandes a confirma cu ta den contacto cus u famia y ta ofreciendo sosten consular, pero no a duna mas detaye, citando regla di privacidad. Mientras tanto, autoridadnan Venezolano no a revela e motibo pa su aresto.

Segun Trouw y observadornan internacional, e caso ta fit den un patronchi preocupante: decenas di ciudadano stranhero a keda deteni bao condicionnan sospecha como politico. NGO di derecho humano, Foro Penal ta describi detenidonan asina – incluyendo e turista Hulandes aki – como “rehen stranhero”, secuestra pa pone presion riba gobiernonan stranhero.

Manera ta conoci, relacionnan bilateral entre Hulanda y Venezuela ta tenso. Na januari, Venezuela a restringi e presencia di diplomatico Hulandes den su teritorio, pa loke gobierno Hulandes a retira algun di su propio personal. E represalia diplomatico aki a sigui eventonan manera Hulanda ofreciendo pa alberga figuranan di oposicion Venezolano, y critica anterior di e reeleccion di presidente Nicolas Maduro.

E caso menciona pa Trouw ta parti di un patronchi mas amplio reporta pa NGOnan manera Amnesty International y Human Rights Watch, unda autoridadnan Venezolano ta secuestra ciudadanonan stranhero, acusa nan di cargo dudoso, y despues nan ta desaparece. Website di noticia Latino Americano, Infobae, a reporta cu “e practica di secuestra hende pa intercambia nan pa beneficio politico tin un historia largo y ta patenta pa regimen Cubano. Maduro, como fiel discipulo, ta bin aplicando e mesun receta: detene stranhero, acusa nan di magnicidio, terorismo of spionahe, y despues usa nan den negociacionnan como piesa riba un borchi di ahedres.” Esaki a keda constata e siman aki mes, na momento cu Venezuela a intercambia e stranheronan deteni den su prisonnan pa su propio ciudadanonan – algun di nan, acusa di pertenece na e gang violento, Tren de Aragua.

Januari ultimo, despues cu enviado di Trump, Richard Grenell a biaha pa Venezuela, a logra e liberacion di seis ciudadano Mericano a cambio di e licencia pa Chevron continua exportando crudo Venezolano.

Loke ta preocupante ta cu e administracion Mericano a bolbe drenta den e dinamica toximo di e regimen, unda ta secuestra ciudadano stranhero pa despues libera nan a cambio di algun beneficio. Algun tempo despues ta secuestra otro ciudadano, y ta reinicia e ciclo.

Secuestro na man di gruponan criminal
 Pero no ta solamente e tipo di secuestro “oficial” aki ta sucede na Venezuela. Tambe tin casonan unda gruponan criminal, narcotraficante y paramilitar ta secuestra ciudadano stranhero como un manera pa financia nan operacionnan.

Venezuela ta entre e paisnan mas peligroso na mundo pa secuestro, atraco arma y robo di auto. Gruponan criminal organisa – incluyendo gang di caya operando den “zonanan di paz” y paramilitarnan pro-gobierno conoci como ‘colectivos’ – hopi biaha ta orkestra extorsion, secuestro, desaparicion forsa y hasta asesinato riba contract. E ‘colectivos’ ta gruponan paramilitar pro-gobierno, hopi biaha usa pa suprimi disidencia, pero tambe ta participa den actonan criminal. Investigacion ta describi un coincidencia entre e paramilitarnan aki, guerrillanan Colombiano (ELN y disidentenan di FARC) y gangnan criminal, specialmente den regionnan fronteriso.

Na 2009 so, a reporta casi 17mil secuestro, maske cifranan oficial probablemente ta hopi menos cu e realidad. Nacionnan Uni, gruponan di derechonan humano y e Observatorio Venezolano di Violencia, sinembargo, ta reporta cu hopi di e secuestronan no ta keda reporta.

Riba rednan social rumornan persistente indicando cu na Venezuela ta paga hopi placa pa secuestra Arubiano of ciudadanonan Hulandes, un rumor cu ta bira mas fuerte den e contexto actual.
Por considera por ehemplo e caso reporta weekend ultimo, di capitan Hulandes, Pim de Rhoodes y tripulacion di su barco, N35, a desaparece despues di un encuentro cu marina Venezolano, y ainda ta desaparecido. Y mientras cu e rumor di un cantidad di Arubiano secuestra no ta confirma, hecho ta cu si tin al menos dos caso di ciudadano Hulandes secuestra na Venezuela.

Y tanten cu Hulanda mes no confirma e motibo pakico a cambia e alerta di biahe, speculacion ta continua.