(AFP) —Rusia a bisa diahuebs cu a tuma control di otro puebo na region Dnipropetrovsk di Ucrania, unda tropanan Ruso ta avansa desde zomer, a pesar cu Moscu no a reclama oficialmente e region.
Temperatura friu no a calma e pelea, mientras cu e di cuater aniversario di e guera ta acerca, y mientras cu un esfuerso diplomatico na fin di aña pa termina e conflicto mas serio di Europa desde Segundo Guera Mundial te awor no a produci ningun resultado concreto.
Ministerio di Defensa di Rusia a bisa den un declaracion cu e ehercito Ruso a captura e pueblo Bratske, na sur di e region Dnipropetrovsk.
Moscu a anuncia e captura mientras cu Kyiv a informa cu atakenan nocturno di Rusia riba region Dnipropetrovsk a laga mas cu un miyon persona sin energia electrico.
Avance di Rusia den Ucrania a haya mas rapidez, cu tropanan Ucraniano, cu ta inferior tanto den cantidad como den armamento, ta lucha pa logra detene nan.
Tropanan Ruso a drenta region Dnipropetrovsk — cu ta situa na west di region Donetsk — den augustus di aña pasa.
E no ta un di e cuater region oriental y meridional di Ucrania — Donetsk, Lugansk, Zaporizhzhia y Kherson — cu Kremlin a proclama como territorio ruso. Moscu tambe ta ocupa parti di region Kharkiv na noordoost di Ucrania.
Siman pasa, Ucrania a bisa cu a ordena evacuacion di miles di mucha y nan mayornan for di campamentonan cerca di frente di combate na regionnan Zaporizhzhia y Dnipropetrovsk.
Lider Ruso Vladimir Putin a insisti den siman reciente cu Moscu tin intencion di tuma e resto di Ucrania oriental — sea pa medio di forsa militar o pa via diplomatico.
Rusia a lansa su ofensiva na escala completo contra Ucrania na februari 2022.
