(AP) – Autoridadnan Ruso a bisa diamars cu nan lo blokea Twitter dentro di un luna si no tuma e stapnan necesario pa elimina contenido prohibi, un movida cu ta escala e enfrentamento largo di gobierno Ruso cu plataformanan di rednan social cu a hunga un rol mayor den amplificacion di disidencia na Rusia.
Vigilante di comunicacion estatal Ruso, Roskomnadzor, siman pasa a anuncia cu ta reduciendo velocidad di upload potret y video riba Twitter pa motibo di su supuesto fayo pa elimina contenido curashando suicidio entre muchanan, y informacion tocante droga y pornografia infantil.
E agencia a bisa cu Twitter a faya di elimina mas di tres mil post cu contenido prohibi, incluyendo mas di 2500 post curashando suicidio entre menornan di edad. E plataforma a responde enfatisando su politica di cero tolerancia pa explotacion sexual di mucha, promocion di suicidio, y benta di droga.
Diamars, hefe interino di Roskomnadzor, Vadim Subbotin a argumenta cu Twitter ainda no tabata cumpli cu exigencianan di autoridadnan Ruso.
“Twitter no ta reacciona apropiadamente na nos peticionnan, y si cos sigui asina, e ora aki un luna e lo ta blokea, a base fuera di corte”, Subbotin a bisa agencia noticiero Interfax. El a agrega cu Roskomnadzor na e momento aki ‘no ta registrando stapnan specifico di Twitter pa elimina contenido prohibi’.
Twitter no a responde inmediatamente na un e-mail solicitando comentario.
Autoridadnan a critica plataformanan di rednan social cu a ser usa pa trece decenas di miles di persona riba caya na Rusia e aña aki pa exigi liberacion di lider di oposicion, Alexei Navalny. E ola di demostracion tabata esun mas grandi den varios aña, presentando un reto mayor pa e Kremlin.
E autoridadnan a alega cu e plataformanan di rednan social no a elimina yamadonan pa muchanan join e protesta. Presidente Ruso, Vladimir Putin a urgi polis pa actua mas pa monitor plataformanan di rednan social y track down esnan cu ‘ta hinca mucha den accionnan ilegal y no sanciona riba caya’.
Esfuersonan di gobierno pa reforsa control di internet y rednan social ta bay back na 2012, tempo cu un ley permitiendo autoridadnan blacklist y blokea cierto contenido online a wordo adopta. Desde e tempo aya, un cantidad aumentando di restriccionnan enfoca riba app di mensahe, website y plataforma di rednan social a keda introduci.
Na 2014, autoridadnan a adopta un ley cu ta rekeri servicionan online ward ae datonan personal di usuarionan Ruso na Rusia, y desde e tempo ey a purba di forsa Facebook y Twitter pa cumpli cu esaki. Ambos compania a ricibi varios multa, prome cantidadnan chikito di alrededor di $50, y aña pasa e ekivalente di $63mil cada un, pa no cumpli.
Gobierno repetidamente a expresa menasa di blokea e dos gigante di rednan social, pero no a introduci un prohibicion directo maske e ley ta permiti esaki, probablemente pa miedo cu e movida por genera demasiado indignacion publico. Solamente e red social LinkedIn, cu no tabata hopi popular na Rusia, a ser prohibi pa autoridadnan pa faya di warda datonan di usuario na Rusia.
Sinembargo, algun experto a bisa cu autoridadnan por ta considerando seriamente e posibilidad di prohibicion e biaha aki.
Subbotin a bisa diamars cu Roskomnadzor tin e ‘capacidadnan tecnico’ necesario pa blokea Twitter, y cu e agencia no ta descarta reduci velocidad of blokea otro plataformanan online si esakinan ‘viola leynan Ruso y no ta cumpli cu exigencianan di Roskomnadzor’.
Na 2018, Roskomnadzor a faya di restringi acceso na e app popular di mensahe, Telegram, pa motibo di su rechaso pa entrega yabinan di cifrahe usa pa cifra mensahe (encryption). Aña pasa, e vigilante oficialmente a elimina exigencia pa blokea Telegram, cu a ser usa ampliamente a pesar di e prohibicion, incluyendo den institucionnan gubernamental.
