Un cos ta cu e partidonan tradicional AVP y MEP ta pega cu e mesun malesa di “friends and family” y otro cos ta cu Nel Oduber mes tambe no tin cuero di cara ora di acepta pa nombr’e como miembro den hunta di comisario di WEB Aruba N.V.. Aparentemente e pago di por lo menos dos mil florin pa luna ta mucho atractivo p’e nenga. Aki nos ta ripara cu e politica bieu di fix famia ta biba keto bay den MEP. No ban lubida cu Nel Oduber ta tata di Dangui cu ta minister den Gabinete Wever-Croes. Ademas Nel Oduber tabata un politico activo for di 1975 ora el a subi lista di MEP y a dirigi nos pais den funcion di Minister-President na tres diferente ocasion.

Tambe ta keda demostra un actitud sinberguensa di un ex-prome minister cu ya caba tin un di e pensionnan mas lucrativo den henter Caribe Hulandes! Cu awe Nelson Oduber ta un persona rico ta danki na su lasonan cu MEP. Na edad di 76 aña, despues di como 15 aña cu e ta for di politica e ta gosando di varios pension acumula di empleado publico, di Eilandsraad y di diputado tempo di Antias, di parlamentario di Aruba y di minister-president di Aruba. Awo, comosifuera poco, Nel Oduber lo cobra tur luna como comisario di WEB mas cu un salario minimo. E pregunta ta: Cuanto mas mester pa ta suficiente? Ki ora bo mes lo bisa “ta basta” y stop cu abuso di poder y maluza e sistema anticua y corupto cu nos gobierno ta maneha e pais aki?

Ta incomprendibel con Nel Oduber por haya e funcion di comisario ora nos tene cuenta cu principio di bon gobernacion. Principio di bon gobernacion ta exigi cu un candidato pa bira comisario mester ta conoci pa ta imparcial, confiabel y mester tin suficiente conocemento, habilidad y experiencia. Nel Oduber ta MEP y simplemente no por ta imparcial pa cu maneho cu MEP kier hiba riba area di energia. Pero Nel Oduber no ta hurista, no ta un accountant, no ta un ingeniero. E no a demostra di por hiba un empresa na exito financiero den sector priva. Den gobernacion si bay bon of malo, semper a cobra toch y cobra bon. Es mas, Nel Oduber siendo lider di MEP y ex-prome minister tambe ta culpabel pa e deficit y debe biyones cu pais Aruba a crea den e ultimo decadanan.

Nel Oduber cu su 76 añanan di edad, awor lo mester supervisa y controla Alfredo Koolman, un ingeniero studia den maneho di refineria y planta di produccion manera WEB. Ta con of kico Nel Oduber lo controla y supervisa? E si lo pidi pa lesa e contract secreto cu Eagle LNG? E si lo por splica pueblo con nos ta bay combina uzo di gas y hydrogen den produccion di awa y coriente? E si lo por revisa e deal pa fiansa cu un compania nobo cu ta afilia of ta hopi cerca di Arulex Trust?

“E hendenan aki a para bira sin gevoel, sin escrupulo, nada pa nan ta abnormal mas, tur cos por, tanten cu ta den nan inner circle. Ta comosifuera cu tin un competencia entre cierto famia di ken por probecha mas di e sistema corupto di gobernacion. Den e caso aki tanto di banda di famia Wever-Croes y awo di famia Oduber tambe. Nan lo sigui tambe te dia cu pueblo pone pia abou y para corupcion”, asina mr. dr. Ryçond Santos do Nascimento, miembro independiente den Parlamento di Aruba a expresa.

E nombramento di Nel Oduber den Hunta di Comisario di WEB entrante dia 1 di juni 2023 ta subraya e motibo dicon mester manda un señal den e siguiente eleccion pa tanto MEP como AVP, cu e tipo di politica aki no ta aceptabel mas! No tin hustificacion cu di tur experto, tur hoben bon studia, cu mester saca un politico bon para y pensiona, pa e bay sinta un bes pa luna den un reunion y pag’e dos mil florin pa luna?

E critica den comunidad ta grandi, specialmente pasobra gobierno ta cobrando impuesto na mal ordo, ta aumenta e peso fiscal riba comercio y cumprado, ta bisa cu mester baha gasto pero ta añadi un miembro mas den e directiva di WEB. Si tur e aña cu minister Glenbert Croes a tuma WEB over, cu e no a sinti falta di un miembro, dicon awo a core nombra ex-lider di MEP den e puesto anto? Y pa haci e asunto mas serio y cu mas holo na corupcion, a kita sua di minister-president, esta Lati Wever pa pone primo di e mandatario, Gos Oduber y pa awo añadi Nel Oduber, otro primo di Gos, den e mesun organisacion. MEP ta demostra aki un actitud corupto y no integro dilanti su votadonan y dilanti henter e pueblo di Aruba.

Si mira e constelacion di e hunta di comisario di WEB, anto ta hopi cla cu ey ta prome minister Evelyn Wever-Croes ta manda. Ningun di e miembronan ta hende nombra a base di escogencia di minister Glenbert Croes. E ultimo aki mas bien ta poni den e funcion di Minister di Energia pero pa “spek en bonen” pasobra e directiva no ta su hendenan y e bufete di abogado tampoco. Pa cara a nombr’e Minister di Energia pero mas bien e ta un “minister zonder portefeuille” cu no tin nada di bisa den maneho di energia di nos pais y pio den e companianan estatal.

Pues, pa finalisa: MEP a regla pa nan grupo refinancia WEB, Elmar y Utilities den un solo financiamento. Nan a pone sua den funcion di director pa firma cu Eagle LNG, cu ta hopi yega na e bufete Croes, Wever and Ruiz, a duna e dos directornan “golden handshake” pa nan no stroba e deal miyonario di gas, a causa cu Richard Eman a tuma honor na su mes y retira, a nombra primo como presidente di WEB y awo pa culmina, a “fix” Nel Oduber pa e haya un aumento di dos mil florin pa luna riba tur e miles di florin cu e ta cobra pa luna na pensioen.

“Asina MEP ta pretende cu e ciudadano ta central. Awo henter Aruba a realisa cu ora MEP ta na mando, ta nan famia y amigonan so ta central y ta sali beneficia”, di acuerdo cu Ryçond Santos do Nascimento.