Operadornan di telecomunicacion di Sur Korea a cende rednan super- rapido di internet mobil 5G abruptamente adelanta, den un intento pa sigura cu e pais ta e prome den mundo pa lansa e servicio.
E operadornan ta bisa cu smartphones habilita pa 5G ta capaz di download data 20 biaha mas lihe cu e 4G existente, cual en teoria lo habilita usuarionan pa download file di pelicula casi instantaneamente. E rednan mas lihe tambe lo mehora broadcast en bibo y servicio di realidad virtual, segun e companianan.
E rednan 5G di e tres operador mobil di Sur Korea a activa 11pm diaranson, algun ora prome cu e operador Mericano Verizon a cende nan red 5G den algun area di Minneapolis y Chigaco, un siman prome cu plan. E operadornan inicialmente a planea pa cuminsa nan servicio 5G diabierna, pero a bay dilanti pa keda prome cu Verizon. E cambio a yega algun ora despues di un reunion entre e operadornan y reguladornan di gobierno, kende a modifica terminonan di servicio pa asina e companianan por registra usuarionan mas trempan.
Sinembargo, e servicio na Sur Korea inicialmente tabata disponibel na algun individuo selecta como promotor di e brand, incluyendo super strea di skating artistico, Yuna Kim, kende SK Telecom a anuncia como un di su ‘prome clientenan’.
Clientenan regular na e capital Seoul, y algun otro ciudad mayor, por a registra pa servicio 5G cuminsando ayera. E proveedornan tin plan pa expande nan cobertura na 85 ciudad rond di e pais pa fin di aña.
E supuesto logro a wordo considera simbolico. Park Tae-wan, un oficial di ministerio, a bisa cu e referencia di ‘prome den mundo’ posiblemente por yuda e industria mobil.
