Corte di Prome Instancia di Aruba a emiti un sentencia dia 3 di september 2025, den e caso di Sabine Cornelia Antonia de Groot contra Pais Aruba. Hues a dicta cu De Groot a ser retira eroneamente y mester ser reinstala den su funcion como coordinador principal na Enseñansa pa Empleo, cu pago completo y compensacion adicional.

Sabine de Groot, un mama soltera di dos yiu, a cera un contrato laboral cu Pais Aruba na comienso di 2025. Segun e contrato, e lo ta emplea pa Enseñansa pa Empleo pa un periodo di dos aña, cu un salario mensual bruto di Afl. 8.190, un toeslag di 25%, y un toeslag pa telefon.

Aunke De Groot a firma e contrato, gobierno no a logra firm’e formalmente. Esaki despues a resulta di ta un aspecto crucial den e argumento di gobierno pa declara e acuerdo invalido. No obstante, De Groot a cuminsa su tareanan oficialmente dia 1 di februari 2025, despues di aprobacion di gobierno di e tempo ey, Gabinete Wever-Croes.

Dia 31 di juli 2025, De Groot a ricibi un carta den cual gobierno actual a termina su empleo unilateralmente, entrante 30 di augustus 2025. Segun gobierno, “no tabatin un base legal mas” pa De Groot sigui cu su tareanan. Nan a cita un revision di e gobierno nobo, cu a declara cu e decision anterior no tabata politicamente ni financieramente sostenibel mas.

E carta a referi explicitamente na un falta di cobertura financiero y a bisa cu e vacatura lo ser termina permanentemente. De Groot a haya un luna di aviso, pero su posicion a keda aboli oficialmente.

Den e procedura sumario inicia pa De Groot su abogado, señor D.G. Kock, De Groot a argumenta cu su retiro a constitui un abuso di poder. El a argumenta cu el a cumpli cu su funcion corectamente y adecuadamente, loke a keda confirma pa evaluacionnan interno positivo. Tambe el a señala cu e decision a ser tuma inmediatamente despues di e periodo demisionario di Gabinete Wever-Croes II y pues tabata politicamente motiva.

Ademas, el a enfatisa su situacion personal: como mama soltero cu un hipoteca y dos yiu hoben, e perdida di su entrada tabata catastrofico. Di acuerdo cu su abogado, gobierno no a cumpli cu e principionan di husticia rasonabel.

Pa loke ta e defensa di gobierno, abogado M.L.J.P. Willems a sostene cu no tabatin un acuerdo legalmente valido pasobra e documento nunca no a ser firma pa un representante autorisa. Ademas, nan a argumenta cu gobierno tabata liber pa revisa decisionnan den luz di circunstancianan politico y financiero nobo.

Gobierno a argumenta cu e posicion pa cual De Groot a ser nombra no tabata existi mas, y cu sigui cu su empleo tabata financieramente iresponsabel. A haci referencia na e falta di cobertura presupuestario y e necesidad di reforma deni gobierno.

Hues A.J.J. van Rijen a desconsidera completamente e argumento di gobierno den su sentencia. Segun corte, en berdad tabatin un contrato di trabao valido, a pesar di falta di un firma di parti di gobierno. E hecho cu De Groot a cuminsa cu su tareanan y a ricibi salario a confirma e creacion di e contrato, segun hues.

Corte a dicta cu e retiro di De Groot a viola e principionan di rasonabilidad y husticia y, mas ainda, a demostra abuso di autoridad. E referencia na cobertura financiero no tabata suficiente fundamenta. Ademas hues tambe a duna importancia na e hecho cu De Groot a haya un disculpa publico di departamento di HR, cu a confirma cu no tabatin cuestionamento di su actuacion.

E sentencia a impone obligacionnan pisa riba gobierno. Dentro di cinco dia di entrega di e sentencia, De Groot mester tabata completamente reinstala den su posicion como coordinador principal na Enseñansa pa Empleo.

Ademas gobierno mester paga un boet di 500 florin pa dia pa cada dia cu e no cumpli cu e sentencia, cu un maximo di 250 mil florin.

Reembolsa salario completo for di 30 di augustus 2025, incluyendo tur e compensacionnan.

Reembolsa gastonan legal, calcula na 225 florin pa citacion, 450 florin pa gastonan di corte, y 1.000 florin pa gastonan di abogado.

E sentencia tambe a ser declara provisionalmente ehecutabel, kiermen cu gobierno mester cumpli cu esaki inmediatamente, sin importa cualkier apelacion.

E decision no tin solamente implicacionnan huridico pero tambe politico. E ta confirma cu un gobierno nobo no por simplemente reverti acuerdonan di trabao existente basa riba cambionan di politica. E hues a enfatisa cu principionan di ley di empleo ta conta tambe pa gobierno, y cu un gobierno cu ta invoca limitacionnan financiero mester duna hustificacion robusto.

Pa funcionarionan publico y empleadonan temporal, e decision ta pone un precedente: hasta si un contrato no a ser formalisa completamente, trabao real realisa por ta suficiente pa duna proteccion legal.

Politicamente, e decision por pone presion riba gobierno pa ta mas cauteloso den su nombramento y retiro, specialmente durante e periodo di transicion entre gabinetenan.

Gobierno di Aruba por considera un apelacion, pero esaki no ta cambia e hecho cu gobierno mester implementa e decision provisionalmente. Si no, e ta core riesgo di mester paga sumanan significante di boet.

E caso aki ta toca un tema esencial den cultura administrativo Arubano: e relacion entre politica y continuidad den e administracion. Mientras cu politiconan hopi biaha ta implementa cambio durante un transicion di poder, e decision aki ta pone un limite. E ta manda un mensahe cla cu ambtenaarnan no mester ta peonnan den strategianan politico y cu gobierno mester tene su mes na e mesun normanan di ley laboral cu un dunador di trabao regular.

E sentencia aki ta marca un paso importante den proteccion di derechonan di empleado na Aruba, particularmente pa ambtenaarnan. Sabine de Groot no solamente ta gana su trabao back pero tambe ta pone un precedente huridico cu futuro casonan lo referi na dje.

E mensahe central ta cla: contratonan di trabao, unabes ehecuta, no por ser termina lihe door di gobierno. Cambionan politico no mester ta un motibo pa desbentaha di empleadonan individual.

Aunke den e sentencia oficial Corte no ta menciona ningun minister ni ministerio y ta indica cu e caso a ser entama pa De Groot contra pais Aruba, y ademas e carta di retiro cu De Groot a ricibi a bin for di Gobierno di Aruba, sin menciona nomber ni ministerio specifico, medionan di comunicacion local ta indica cu e minister tras di e situacion aki ta Gerlien Croes (Futuro).