SADA a convoca un conferencia di prensa unda a comparti cu prensa local su reaccion tocante un publicacion cu minister di Finanzas a haci. Den e publicacion aki, e minister a practicamente ripiti e declaracion di administracion di Aduana y esaki no a cay den bon tera cu e miembronan di e sindicato despues di e accion di diabierna.

E representante di SADA a cuminsa dunando un bon bini na esnan cu tabata presente y comparti cu “inderdaad nos a dicidi na ultimo ora pa toch duna un update y informacion tocante loke a sucede diabierna, pero prome cu nos reacciona nos a tuma nota tocante un declaracion di minister di Finanzas.”

SADA a bisa cu a tuma nota di diferente publicacion y comentarionan riba medionan local y rednan social, y kier a enfatisa cu “duana of sindicato SADA ni su miembronan ningun momento tabata contra pone camara den visitatieruimte, esey no ta e problema. E problema primordial ta kendenan tin acceso pa wak e grabacionnan di e camara. Nunca nos tabatin issue pa tin camara. Manera nos a bisa diabierna, nos mes tin aña ta boga pa pone camara pa motibo cu esaki ta garantisa seguridad di tanto colega como miembro di SADA y tambe pasaheronan.”

Nan a tuma nota tambe di algun comentario cu a cuminsa circula y a keda lansa den nan contra. Entre esaki algun persona ta comenta cu e proposito di e camara ta pa e proteccion contra abuso di poder, cu hopi biaha ta tuma luga di parti di ambtenaarnan. Pa cu esaki a comenta: “Nos kier bisa esaki: nos pasaheronan, clientenan di aduana cu ta sinti cu nan derecho ta trapa pa ambtenaarnan, tin tur e caminda pa entrega un keho. Esaki no ta algo nobo ni secreto, semper e por a pasa.” Segun e declaracion di SADA, e camara lo yuda pa si den dado caso un “pasahero sinti cu nan derecho ta trapa of ser abusa den e manera cu nan ta ser trata”, na momento cu entrega un keho, por haci uso di e imagennan di e camara pa saca afo si e keho berdaderamente tin base of si esaki no tin base, cual segun SADA a yega di pasa den varios ocasion. “Pa e motibo ey nos tin cu pone enfasis cu nos no tin problema cu e camara pero atrobe, e beheer di kendenan ta wak e camara beelden, ta esey ta locual nos ta condena.” Esaki pa motibo cu segun loke a comparti, aduana no tin acceso na e imagennan di e camara.

Pa loke ta trata e declaracion di minister di Finanzas actual, representante di SADA a comenta cu a “tuma nota cu e minister di Finanzas a duna declaracion unda el a ‘copy paste’ locual Cuerpo di Aduana a publica riba rednan social. Nos tin cu bisa cu nos ta lamenta esaki masha hopi mes, pasobra minister di Finanzas, ken ta hefe directo di aduana – nos sa cu e no ta na Aruba, pero e tin e contact number di sindicato SADA. Pues nos ta lamenta cu el a simplemente copia e texto di dienst di aduana y a publica esaki como si fuera un comentario di dje personal.” E declaracion aparentemente copia aki a causa decepcion pa motibo cu segun SADA a conta, esaki a causa critica y varios miembro di aeropuerto a acerca na e sindicato pa condena e actitud aki. SADA a splica cu “nan a puntra di biaha si minister a contact nos, pero e no a haci esaki. Normal ora e minister ta biaha tin un minister cu ta keda na su luga como waarnemer. Te cu awo nos no a tende si e minister di Finanzas a contacta e waarnemer, Sr. Arthur Dowers… pero di banda di gobierno nos no a haya ningun acercamento pa puntra kico ta going on, dus e minister simplemente a bay tras di leiding. Anto esey pa nos ta un tiki di condena pasobra e minister por a tuma contact cu nos.”

Un punto cu a resalta ta e hecho cu den e publicacion, a menciona cu ta “compronde e preocupacion di trahado di aeropuerto.” Sinembargo SADA a trece dilanti cu den su opinion, ta obvio cu tin un falta di busca di “sa miho, pasobra si el a skirbi esey ta pasobra e no sa cu niun hende ta compronde e preocupacion,” agregando cu e miembronan aki a acerca administracion mas di un luna pasa pa puntra tocante e topico aki.

E minister a indica cu Cuerpo di Aduana mes a pidi pa e camaranan aki, pero di locual por a compronde y cu SADA mes a expresa, “nos a por a compronde di e waarnemend directeur di aduana cu ta un decision di e directeur y ex-hefe di aeropuerto, dus no tabata algo conoci pa ful e cuerpo di aduana manera e minister a indica den su mensahe.”

“Nos a tuma nota di algun pasahe den esaki unda ta pone cu e camara ta poni pa entre otro, motibo manera brinda seguridad pero tambe pa capta posibel peligro pa e ambtenaar.” Sinembargo, segun SADA esaki lo klop solamente si e maneho di e camara ta den man di Aduana mes, pero den e caso aki e maneho di e camara ta den man di AAA. “Kiermen si tin potencial di peligro pa e ambtenaar cu ta haciendo su trabao den e momento ey na visitatieruimte, nunca of por ta nos ta haya sa ora e peligro a caba di pasa.” E situacion ta duna e impresion aki pa motibo cu segun SADA “actualmente no tin un situacion unda bo por ser alerta for di prome, pasobra ta un detaye conoci cu den e departamento aki no tin 100 hende ta traha cu ta monitor e camara.” Esaki ta haci cu no tin un confiansa completo y ta algo cu mester keda bao maneho di por ta sea hefenan so of pa recherche dienst di aduana, “pero den mando di tercera parte e ta algo peligroso pa pasahero of trahadonan di aduana cu ta haci su trabao den e momento ey.”

Otro comentario cu ta circula ta “cu esaki no ta afecta privacidad di ningun hende ni pasahero” sinembargo SADA a splica cu “unabes cu e camara ta manda linea recta ariba e maleta, obviamente bo ta haci un inbreek den privacidad di pasahero” y esaki ta un punto sumamente delicado “cu di nos conseho mester a ta mas cauteloso riba con ta saca informacion aki, como si fuera ningun hende ta autorisa pa ley ta wak den maleta di pasahero ta haci esaki, pues si nos ta traha a base di ley mester keda consecuente.” SADA a trece dilanti un ehempel pa ilustra e caso aki, splicando cu si cuerpo policial di Aruba pone camara den su edificio, un tercera parte no lo por tin acceso na e imagennan aki. Di mesun manera, e sindicato ta considera cu e imagennan aki no mester cay den man di un tercera parte cu ta fuera di aduana.

SADA a comenta cu algo cu a hala atencion di e publicacion tambe ta ora di cera esaki, a bisa cu lo sigui “dedica na mantene ambiente laboral placentero” sinembargo e realidad ta cu a tene varios reunion cu e minister unda a splica detayadamente cu tin un falta di confiansa entre e trahadonan “pa cu leiding, pues ta lamenta cu durante prome reunion a splica e situacion actual na cuerpo di aduana unda tin un demotivacion enorme ta bibando y ta publica e tipo di declaracion aki comosifuera cu tur cos ta ‘koek en ei’ den cuerpo di aduana.”

A clausura e conferencia di prensa aki expresando cu tin speransa cu esaki lo por ser coregi door di e minister actual y ta spera cu unabes e “yega back, cu nos por sinta y atende e asunto aki sin cu mester recuri na trece esaki na conocemento di tur hende,” agregando cu “nos kier usa e oportunidad aki pa informa nos miembronan y coleganan cu nos lo sigui trata pa toch yega na un relacion di trabao cu e minister satisfactorio.”

SADA a expresa cu lo duna e minister un chens pa regresa for di su biahe, y tin speransa cu ora e ta back na pia di trabao e lo clarifica y aclaria e problematica aki.